(کابل ټکی کام، ۱۳۹۶، مرغومی ۱۶) د ننګرهار ولايت په خوږياڼو ولسوالۍ کې نا معلومه وسله والو يو ديني عالم پر ډزو وژلی دی.
د خوږياڼو ولسوال شمس الحق پېښه تاييدوي وايي، نن سهار د يادې ولسوالۍ اړوند د چمتلې په سيمه کې د امام ابوحنيفه مسجد ملا امام او د دغې مدرسې استاد قاري شمس باندې نا معلومه وسله والو ډزې وکړې او ځای پر ځای ووژل شو.
د ولسوال په خبره، تر اوسه د نوموړي د وژنې په تړاو څوک نه دي نيول شوي خو په اړه يې پلټنې روانې دي.
په ننګرهار کې د داعش ډلې د راپيدا کېدو راهيسې په دغه ولايت کې د ديني عالمانو او مدرسو استادانو د وژل کېدو لړۍ روانه ده، چې د ځينو عالمانو د وژنې مسئوليت هم داعش ډلې په غاړه اخيستی دی.
تر دې مخکې، د ننګرهار په روداتو، کوټ، بټي کوټ، بهسودو، چپرهار او يو شمېر نورو ولسواليو کې د داعش ډلې له لوري ديني عالمان په نښه شوي دي.
د پوځي کارپوهانو په باور، د ديني عالمانو په وژنو کې د داعش ډلې سربيره ځينې استخباراتي کړۍ هم لاس لري غواړي په سیمه کې مذهبي جنګ ته لاره هواره کړي.
