(کابل ټکی کام ۱۳۹۶ مرغومی۱۹ فرید افغان)
لسګونه سپینګري او مشران چې تیره ورځ یې خپل شکایت تر ملي شورا رارسولی و، په یوه خبري غونډه کې څرګنده کړه چې په دې ولایت کې په غلا، قتل او اختطاف په پیښو کې ځایي پولیس (اربکیان) ښکیل دي.
مشرانو وویل چې، په ولایت کې یې په رڼا ورځ د اختطاف او غلاوو پیښې رامنځته کیږي، خو په وینا یې چې امنیتي چارواکي یې د لارښوونکو په څیر رول لري.
د شينوارو يوشمېر قومي مخورو په ننګرهار کې له یوې صرافۍ څخه د ۲۵۰ زره ډالرو د غلا تور پر سیمیزو پولیسو واچاوو، چې په وینا یې هغوی پکې ښکیل و.
د مشرانو په استازولۍ ملک عثمان شينواري پر لوړ پوړو امنیتي چارواکو تور ولګاو چې په ګمارنو کې یې له دقت څخه کار نه دی اخیستی او ټول جنایي مجرمین یې د عسکرو په صفت دې ولایت ته ورلیږلي.
قومي مشر او د بټي کوټ ولسوالۍ د مارکو بازار صراف نصيب الله بیا قضایي ارګانونه او امنیتي چارواکي تورن کړل چې ګواکې جنایي بندیان ونیسي او د پیسو په بدل کې یې ژر خوشي کوي.
نوموړي وویل؛ ‹‹ پیسې مې ځايي پوليسو اخيستي، خو محکمې غلو ته برائت ورکړی دی››
که څه هم د ننګرهار چارواکي وایي چې له صرافۍ څخه د غلا په تور یې یو شمیر کسان نیولي، خو سیمیز خلک بیا وایي چې حکومت دې په دې برخه کې رغنده ګامونه واخلي او دوی دې په نمایشي هڅو نه غلطوي.
ننګرهار لومړی ولایت نه دی چې خلک پر امنیتي ځواکونو بې باوري څرګندوي او په جنایي پیښو کې یې ښکیل بولي، څو ورځې وړاندې دخوست خلکو هم رسنیو ته په خبرو کې امنیتي ځواکونه د جنایي پیښو طراحان بللي و.
