(کابل ټکی کام ۱۳۹۶ مرغومی ۲۰ فرید افغان)
د ازبکستان چارواکو نن په حیرتان بندر کې له افغان چارواکو سره د ښاري بسونو د ورکړې شوې ژمنه پوره کړه.
د دې هیواد دجمهور رئیس ځانګړي استازي عصمت الله ایرګشوف د ترانسپورت او هوایي چلند وزیر حمید طهماسی ته د بلخ ولایت اړوند دحیرتان بندر کې ۲۵ عرادې ښاري بسونه او ۳ عرادې تراکتورونه وسپارل.
ازبکستاني استازي له افغانستان سره د ښو اړیکو شالید بیان کړ او له افغانستان سره یې دنورو مرستو ژمنه هم وکړه.
نوموړي همداراز پلخمري ته د بریښنا رسولو سربیره ژمنه وکړه چې راتلونکی کال به افغانستان ته د لیږدول شوې بریښنا نرخونه را ټیټ کړي او همداراز به له دې هیواد سره په نورو برخو کې هم د دواړو لوریو د توافق پر بنسټ مرستې وکړي.
د ترانسپورت وزیر له ازبکستاني استازي مننه وکړه او په دې ارسه کې یې له هغوی دنورې مرستې هیله هم څرګنده کړه.
