عزیر اسدخیل
منافقت هغه رنځ دی چې ایمان داسې له مینځه وړي لکه په لرګې کې د ننه چې چینجی پیدا شی لرګی له بهر نه جوړ ښکاري خو د مینځ نه خراب شوی وي.
ددې لپاره چې د منافقت خطرات، نښې، علامې، او صفتونه وپیژنو او له ویروس څخه یې ځانونه وژغورو باید له لاندې معلوماتو څخه ګټه واخلو:
حضرت ابراهیم التیمی رحمه الله فرمايي:
مَا عَرَضْتُ قَوْلِي عَلَى عَمَلِي إِلَّا خَشِيتُ أَنْ أَكُونَ مُكَذِّبًا .
ترجمه:
زه چې کله خپل عمل له خپلو خبرو سره پرتله کړم ویره راسره پیدا شي چې هسې نه چې درواغجن شم، نو د منافقت په رنځ اخته نشم.
حضرت حسن بصري رحمه الله فرمایی:
مَا خَافَهُ إِلَّا مُؤْمِنٌ ، وَلَا أَمِنَهُ إِلَّا مُنَافِقٌ .
ترجمه:
له منافقت څخه یواځې مؤمن ویره لري او چې ورڅخه بې غمه وي هغه منافق وي .
امام ابن قیم رحمه الله فرمايي:
څومره چې د یو چا ایمان ټینګ وي همدومره هغه ډاریږي چې هسې نه د منافقینو څخه وشمیرل شي.
حضرت ابن ابی ملیکة رحمه الله فرمایي:
أَدْرَكْتُ ثَلَاثِينَ مِنْ أَصْحَابِ النَّبِيِّ صَلَّى اللَّهُ عَلَيْهِ وَسَلَّمَ كُلُّهُمْ يَخَافُ النِّفَاقَ عَلَى نَفْسِهِ.
ژباړه:
ما دېرش کسه صحابه لیدلی دي او هغوی ټول په خپل ځان باندې له منافقت څخه ډارېدل (هسې نه چې الله تعالی یې له منافقینو څخه شمار کړي)
حافظ ابن حجر رحمه الله د پورتني حدیث په تشریح کې فرمایي:
هغه صحابه کرام چې ابن ملیکة رضی الله عنه لیدلي دي چې له منافقت څخه سخت ویریدل لاندې صحابه کرام وو:
حضرت ام المؤمنین عائشه، د حضرت عائشې خور اسماء، ام سلمة، عبد الله ابن مسعود، عبد الله ابن عمر، عبد الله ابن عباس، ابو هریره، عقبة بن حارث، المسور بن مخرمة رضی الله عنهم اجمعین .
نو دا شخصیات به په خپل ځان باندې له منافقت څخه ډارېدل .
حضرت ابن سیرین رحمه الله فرمايي:
زه له بل هېڅ شي څخه دومره نه ډارېږم لکه ددې آیت چې نه ډارېږم چې الله تعالی فرمایی:
وَمِنَ النَّاسِ مَن يَقُولُ آمَنَّا بِاللّهِ وَبِالْيَوْمِ الآخِرِ وَمَا هُم بِمُؤْمِنِينَ (۸) . سورة البقرة
ژباړه:
او ځینې له خلقو هغه څوک دي چې وايي ا یمان مو راوړی دی په الله او په ورځ د قیامت او د جزا حال دا چې نه دي دوی مؤمنان .
له حضرت امام احمد بن حنبل رحمه الله نه پوښتنه وشوه چې آیا ته له منافقت څخه ډاریږې؟
ده مبارک وویل: ومن يأمن على نفسه النفاق ؟ .
ژباړه: او له منافقت څخه به څوک نه ډاریږي؟ .
نو دا د اسلام اسلاف او امامان وو چې هغوی له نفاق څخه ډارېدل نو ددېنه دوه خبرې را معلومیږي :
لمړی:
دا چې نفاق خطرناک شی دی رښتینی مؤمن باید ورڅخه وډار شي ځکه له نفاق سره د انسان دنیا او آخرت دواړه خرابیږي دنیا یې ځکه خرابه وي چې هسې ځان ستړی کوي، کله مصارف کوي، کله خپل کار پریږدي او جومات ته ځي، کله په نورو د خیر په کارونو کې هم ګډون کوي لکن دا هېڅ شی ده ته په درد نه خوري او ټول عبادات، طاعات او د ثواب کارونه یې هدر وي.
دوهم:
دا چې منافقت داسې ندی چې د لرې ښکاري بلکې یو پت وایروس دی چې کله په انسان کې راشي نو انسان ورباندې نه پوهیږي، لکه د سورة بقرې په اتم آیت کې الله تعالی فرمایی چې:
ځینې داسې خلک وي چې هغوی وایی چې مونږ ایمان راوړی دی لکن هغوی مؤمنان نه وي نو ددې امله انسان باید هر وخت خپلو عملونو، خپلې عقیدې، خپلو خیالونو او فکرونو ته پاملرنه وکړي چې څه د منافقت بوی پکې نه وي.
