پاکستان: کرمه ايجنسۍ کې چاودنې شپږ تنه وژلي
(کابل ټکی کام، ۱۳۹۶، سلواغې ۱۰) د پاکستان په قبايلي سيمه کرمه ايجنسۍ کې د يوې چاونې په ترڅ کې شپږ تنه وژل شوي او يو بل ټپي دی.
د کرمې ايجنسۍ امنيتي مسئولينو ډيوه راډيو ته ويلي، چاودنه د غوزګړو سيمې په بسو کلي کې په يوه ډاډسن موټر شوې او ياده مرګ ژوبله يې اړولې ده.
د سرچينې په وينا، په چاودنه کې لومړی د اتو کسانو د وژل کېدو خبر ورکړل شوی چې درې مېرمنې هم پکې شاملي دي.
زياتوي، چې دغه چاودنه د مقبل قوم په خلکو شوې او تر اوسه پوې يې د چاودنې هدف نه دی معلوم.
کرمه د افغانستان سره نږدې په پوله پرته ايجنسي ده چې په زياته اندازه شيعه مذهبه وګړي پکې ژوند کوي او وخت ناوخت د هغوی پر ګڼې ګوڼې ځايونو کې چاودنې کېږي.
