پاکستانی پلاوی کابل ته راورسېد
(کابل ټکی کام، ۱۳۹۶، سلواغې ۱۴) د پاکستان د بهرنيو چارو وزارت د مرستيالې تهمينه جنجوعه په مشرۍ د دغې هېواد يو پلاوی نن لس بجې کابل ته راورسېد.
تر دې مخکې د افغانستان د ملي امنيت رئيس معصوم ستانکزی او د کورنيو چارو وزير ويس احمد برمک پاکستان ته ورغلي و او د هغه هېواد له لوړ رتبه چارواکو سره يې د وروستي امنيتي وضعيت په اړه خبرې اترې وکړې.
تېره ورځ د افغانستان د بهرنيو چارو وزارت په يوه اعلاميه کې وويل، چې په دغې پلاوي کې به د پاکستان ملکي او پوځي چارواکي هم شامل وي.
ټاکل شوې ده، چې له نوموړي پلاوي سره به د افغان حکومت له لوري د افغانستان د بهرنيو چارو وزارت سياسي مرستيال حکمت خليل کرزی ملاقات وکړي او د سيمې د امنيتي وضعيت، ترهګرۍ سره پر مبارزې او وروستيو امنيتي پېښو په تړاو خبرې وکړي.
د پاکستان د بهرنيو چارو وزارت ويلي، دغه سفر له افغان حکومت سره د پخوانيو ګډو توافقنانو په لړ کې ترسره کېږي.
دا په داسې حال کې ده، چې تېره ورځ ولسمشر غني په خپله تلويزيوني وينا کې پر پاکستان تورې پور کړ، چې د طالبانو اصلي مرکزونه په هغه هېواد کې دي او له پاکستانه يې د طالبانو پرضد د جدي اقداماتو غوښتنه وکړه.
تر دې مخکې هم ځينو افغان او امريکايي چارواکو پر پاکستان د طالبانو د ملاتړ او هغوی ته د پناه ځايونو برابرولو تورونه پوري کړي، خو پاکستان وخت په وخت دغه تورونه رد کړي دي.
د پاکستان د بهرنيو چارو وزارت وياند محمد فيصل د ولسمشر غني د څرګندونو په غبرګون کې په افغانستان کې د روانې نا امنۍ مسئوليت پر پاکستان اچول ناسم وبلل او د هېواد په اړه د سيګار راپور ته په اشاره يې وويل، چې د افغانستان څلوېښت سلنه خاوره د وسله والو طالبانو تر حاکميت لاندې ده او له هغه ځايه خپل بريدونه تنظيموي او پراخ پوځي فعاليت لري.
دغه راز نوموړي، په پاکستان کې د طالبانو او حقاني شبکې شتون او فعاليت په کلکه رد کړ او په وينا يې په دې اړه به پاکستانی پلاوی افغان حکومت ته ځواب ووايي.
