ننګرهار: ګډو ځواکونو د داعش ضد پاڅونوالو په لومړۍ کرښه بمبار او چاپه کړې
(کابل ټکی کام، ۱۳۹۶، سلواغې ۱۶) تېره شپه ګډو ځواکونو د ننګرهار ولايت په خوږياڼو ولسوالۍ په زاوې کلي کې د داعش ضد پاڅونوالو په لومړۍ کرښه عمليات او بمبارۍ کړي، چې په ترڅ کې يې د دواړو لوريو تر منځ نښته رامنځته شوې او مرګ ژوبله يې اړولې ده.
د سيمې څخه يوې باوري سرچينې کابل ټکی کام ته وويل: افغان او امريکايي ځواکونه د داعش ضد پاڅونوالو له کلک مقاومت سره مخ شول او د دواړو لوريو تر منځ سخته نښته رامنځته شوه، چې په پايله کې يې څلور تنه پاڅونوال وژل شوي او په وينا يې د چاپې عسکرو ته هم ځاني تلفات اوښتي دي.
د سرچينې په وينا، ګډو ځواکونو د چاپې پر مهال د زاوې په سيمه کې د حاجي زمان کلا او ځينې نورې سيمې هم بمبار کړي،چې له کبله يې د قومي مشر ملک ايوب په ګډون له لسو زياتو کليوالو ته مرګ ژوبله اوښتې ده.
سرچينه زياتوي، په دغو عملياتو کې د افغان ځواکونو تر څنګ ډيری امريکايي ځواکونو برخه لرله چې د عامو خلکو د کورونو دروازې يې په بمونو والوزولې او څو تنه يې له ځان سره د بنديانو په توګه وړي دي.
طالب وياند ذبيح الله مجاهد په خپله رسمي ټويټر پاڼه ليکي: په عملياتو کې د عامو خلکو کورونه په نښه شوي او زياتوي چې ” په سیمه کې مجاهدینو شتون نه درلود”.
دا لومړی ځل نه دی، تر دې مخکې هم ګډو ځواکونو په ننګرهار کې د داعش پر ضد د عامو خلکو او طالبانو لومړۍ کرښې بمبار او پر هغوی شپني عملیات کړي.
څه موده مخکې، په ولسي جرګه کې د ننګرهار د خلکو استازي ظاهر قدير او ددغې جرګې نورو غړو ويلي و، چې امريکا د داعش پرمختګ ته په غير مستقيم ډول لاره هواروي او په خپلو بريدونو کې تر ډېره هغه کسان په نښه کوي، چې د داعش پر خلاف يې وسله پورته کړې ده.
