(کابل ټکی کام، ۱۳۹۶، سلواغې ۱۹) په افغانستان کې د ناټو هوايي ځواکونو قوماندان جنرال جيمز هاکر وايي، په دغې هېواد کې د پخوا په پرتله د هوايي بريدونو کچه څو چنده زياته شوې ده.
نوموړی وايي، د ټرمپ د نوې ستراتيژۍ له اعلان وروسته په هوايي بريدونو کې زياتوالی راغلی چې په خبره يې هره اوونۍ افغان هوايي ځواک څلوېښت او بهرني ځواکونو پنځويشت هوايي بريدونه ترسره کوي.
جنرال جيمز ګواښ وکړ، چې له دې وروسته به په هوايي بريدونو نور زياتوالی هم راولي او په وينا يې (په طالبانو به د بمونو باران وشي).
جيمز زياتوي، په تېر ۲۰۱۷ميلادي کال کې زر هوايي بريدونه د بهرنيانو له لوري او دوه زره نور د افغان ځواکونو له لوري شوي.
نوموړي دغه څرګندونې امريکايي خبريالانو ته د ويډيو کنفرانس له لارې وکړې او ويې ويل چې امریکا په پلان کې لري په راتلونکي کې افغان هوايي ځواک ته پرمختللې جنګي الوتکې ورکړي.
نوموړي ادعا وکړه، چې طالبان يې د جنګ په ډګر کې له مخ کړي او طالبان د ملکي خلکو په وژلو تورن کړي.
جيمز هاکر په داسې حال کې د ملکيانو وژل په طالبانو پورې مربوطوي، چې تېره ورځ هم د غزني ولايت په دهيک ولسوالۍ کې د هوايي بريدونو په ترڅ کې څلور ماشومان ووژل شول.
د ټرمپ د نوې ستراتيژۍ له اعلان وروسته امريکايي او افغان ځواکونو په خپلو هوايي بريدونو، شپنيو چاپو او ورځنيو عملياتو کې زياتوالی راوستی، چې تر ډېره پکې ملکي ميشت ځايونه په نښه کېږي او ولسي خلکو ته مرګ ژوبله اوړي.
