صفي الله “رائد”
ډېری وخت به مې داسې خبرې اورېدلې چې له حیرانتیا ډکې، دردونکې او بوګنونکې به وې خو نن مې داسې خبرې تر غوږو شوې چې عقل مې ورته کار پرېښود.
د عطا محمد نور یو مزاري طرفدار په ویډیو کې لیدل کېږي چې یوې لویې غونډې ته خبرې کوي، د خپلو خبرو په شروع کې د الهي کتاب قران عظیم الشان یو مبارک ایة هم تلاوت کوي او ورپسې وایي: که وحیه بنده نه وای نو تر مسعود وروسته به اوس عطامحمد نورته الٰهي وحیه راتله، نعوذ بالله.
دا په داسې حال کې چې تېره ورځ عطا محمد نور
ولسمشر غني په اسلامیت وننګاوه او چلینج یې ورکړ، چې که ولسمشر غني د الم تر کیف( الفیل) سورت صحیح تلاوت کړ، نو د بلخ ولایت له مقام څخه استعفا کوي.
اشرف غني بې چاره لا عطاته سورة الفیل نه و تېر کړی چې د عطا مینوالو خپل مشر نور ته داسې سوړې سوړې پرتوګ ور واغوست چې فکر نه کوم اوسني خیاطان دې ورته پر ګنډلو وتوانېږي.
حیران دېته یم چې ډېری افغانان داسې چاپسې روان دي چې چا ته خو له سره قران کریم او لمونځ نه ده یاد او څوک بیا د پیغمبرۍ دعوې کوي، وحیې ته انتظار دي.
نه پوهېږم دوی دچا امتیان دي؟!!
هو! افغانان همداسې چا پسې روان دي او د همداسې چا تر شا کلک ولاړ او ملاتړ یې دي.
خفه پر دې یم چې دوخت ډېری شیخان ددې پرځای چې دوی صحیح دین ورسوي لا یې تر شا کلک ولاړ او په ګټه یې ورته دلایل جوړوي.
په دې نظام کې یواځې د مزاري پرونۍ خبره نه ده؛ بلکې دېته ورته له ارتداد ډکې خبرې ددوی بل مشر امرالله صالح په کراتو کراتو کړي، دوی له رهبره تر عسکره ټول په همداسې کفري عقايدو ککړ خلک دي خو! افسوس چې ځينې په اصطلاح پوهانو یې طرفي نه کولای او ددوی کړنو او کفري عقایدو ته یې دلایل نه تراشلی.
دلته د نظام واګي د داسې چې چا په لاسو کې دي چې مشر یې پېغمبر علیه السلام نه پېژني، کله سعدي شیرازي ته پېغمبر وایي او کله هم د پښتو ژبې صوفي شاعر عبدالرحمان بابا ته علیه السلام خطاب کوي.
دحضرت امام حسین رضي الله عنه په پېغمبرۍ کې خو یې تر ډېره وخته شک په یقین بدل و.
په جنازو کې سجدې کوي او په ټکنده غرمو کې تهجد.
بهر حال، ګیله له دوی نده پکار، ګیله د وخت له هغو علماو، قلموالو او لیکوالانو په کار ده چې لاهم ددوی په نفعه دلایل وایي، په ګټه یې کتابونه لیکي، مجلې او مقالې لیکي.
یاربه هدایت.
