(کابل ټکی کام ۱۳۹۶ سلواغه ۱۹ فرید افغان
به دې وروستیو کې امریکایي سفارت او ارګ په ګډه هڅې پیل کړې چې د ۵ نورو کلونو لپاره د ګډحکومت موده وغځوي
په همدې اساس ارګ کوښښ کوي ترڅو د جهادي مشرانو دمخالفتونو دمخنیوي په موخه یوه قیادي شورا رامنځته کړي او هغوی ته د ځینو امتیازاتو په ورکولو سره د راتلونکو مخالفتونو مخه یې ونیسي.
په دې لړ کې تیره ورځ ولسمشر غني له محمد کریم خلیلی، عبدالرب رسول سیاف، ګلبدین حکمتیار، محمد محقق او فضل هادی مسلمیار سره لیدنې کړې او هغوی ته یې د لویو امتیازاتو د ورکولو وړاندیز کړی دی.
د سرچینو په اساس ولسمشر د حزب اسلامي د مخالفت د مخنیوي په موخه د ګلبدین حکمتیار په نوم د پوهنتون دجوړولو ژمنه کړې، او نورو ته یې هم یو لړ امتیازات منلي دي.
خو د حراست او ثبات شورا ویاند بیا ددې د قیادي شورا له جوړښت څخه اندیښنه څرګنده کړې او ویلي یې دي چې دا شورا هیڅ قانوني اصل نه لري.
نوموړی زیاتوي چې حکومت ټولې پریکړې له اساسي قانون سره په ټکر کې کوي.
ویاند مسعود ترشتوال وویل؛ د ټاکنو پرځای بله هره هڅه ورته د منلو نه ده او په ټینګه به یې مخه نیسي.
ځینې شنونکي په دې آند دي چې امریکایان د ګډ حکومت د واک د مودې د غځولو هڅه له دې کبله کوي چې دا حکومت یې د هیڅ فعالیت هیڅ مخه نه نیسي، او دقضایي مصؤنیت سربیره یې د وسلوالو ډلو، ملکیانو او آن پر امنیتي ځواکونو هم د هوایي بریدونو ملاتړی دی .
همداراز په اداراتو کې د ګمارنو او نورو ټولو چارو صلاحیت هم د هغوی سره دی .
د دوی په باور چې د ارګ مشران یواځې د یو خیالي ابزار په توګه کارول کیږي.
