(کابل ټکی کام ۱۳۹۶ سلواغه ۱۹ فرید افغان)
په کابل کې د امریکا سفیر “جان بس“ نن په یوه خبري غونډه کې ټینګار وکړ چې لیواله دي ترڅو د افغانستان خوندي زیرمې استخراج کړي.
نوموړی وویل؛ د کانونو او پترولیم له وزارت سره په دې برخه کې مرستې تیار دي ترڅو چې په وینا یې د افغانستان له اقتصادي اړخه په خپلو پښو ودریږي.
نوموړی داسې مهال داخبرې کوي چې د امریکا ولسمشر دونالد ترمپ په تیر کې ویلي و، چې په افغانستان کې د خپلو میشتو عسکرو او افغان ځواکونو لګښتونه به د افغانستان له کانونو پوره کوي.
د څیړونکو په باور امریکا له سخت اقتصادي بهران سره لاس او ګریوان ده نو په همدې اساس غواړي ترڅو خپل اقتصادي کسر د افغانستان له کانونو چې بیه یې تر ۳ تریلیون ډالر لوړه ده، پوره کړي.
په یاده غونډه کې د کانونو او پترولیم سرپرستې نرګس نهان بیا وویل چې له ۹ میاشتو راهیسې یې د ۱۷۶ شرکتونو سره د کان کیندنې قراردادونه کړي خو په وینا یې چې له قراردادي شرکتونو سره له سختو ستونزو سره مخ دي.
نوموړې زیاته کړه؛ که څه هم عواید مو د تیر کال په پرتله دوه برابره لوړ شوي خو په وینا یې چې دځینو زورواکو سره راجستر قراردادی شرکتونه لاهم له مالیې ورکولو څخه ډډه کوي.
د معلوماتو ترمخه؛ د افغانستان په کانونو ۱.۵ میلیارد دالر پانګه اچونه شوې او د قراردادیانو په وینا، چې که حکومت ترې ملاتړ وکړي حاضر دي تر څو خپل پورونه پرې کړي.
