(کابل ټکی کام ۱۳۹۶ سلواغه ۱۹ فریدافغان)
طالبانو په تخار کې د ولسي خلکو له خوا د عمري په نامه د جوړ شوي ښارګوټي نړول په سختو ټکو غندلي او هغه یې د دحکومت له خوا د ولسي خلکو پرضد بزدلانه او شرموونکې کړنه بللې .
طالب ویاند ذبیح الله مجاهد ویلي ‹‹له دغه اقدام څخه معلومیږي چې د کابل اداره د امریکايي ګټو لپاره استخدام شوی اداره ده، کوم جنایت چې اشغالګر يې د عملي کولو امر ورته کوي، دوي ترې مخ نه اړوي››
طالبانو په خپره شوې اعلامیه کې دا چاره د افغان عسکرو د بي ظرفیتۍ او د پردو لپاره د لوبیدو لویه علامه بللي“
دا په داسې حال کې ده چې نن د تخار ولایت د والي ویاند سنت الله تیمور وویل چې د دې ولایت د درقد په ولسوالۍ د شورعرب سیمه کې یې د عمري په نامه ښارګوټی نیولی او پلان لري په ټولیزه توګه یې ونړوي.
نوموړي ویلي؛ له دې کبله داچاره ترسره کوي ترڅو یاد ښارګوټی د طالبانو عایداتي سرچینه ونه ګرځي او همداراز یې ددې کار د توجیه لپاره ویلي چې یاد ښارګوټی په ۱۵۰ جریبه دولتي ځمکه کې رغول شوی وو.
طالبانو ویلي چې ، دوی د ملکي تلفاتو د مخنیوي په موخه له سیمې څخه له جګړې پرته شاته تګ وکړ.
خو په وینا یې کله چې ګډځواکونه سیمې ته ورسیدل، سمدلاسه یې د نوي جوړ شوي ( عمري ښارګوټي) د دوکانونو او اماکنو په نړولو پيل کړی دی.
عمري ښار ګوټی د دریو ولسواليو ( خواجه بهاؤ الدین، درقد او ینګي قلعه ) خلکو د خپلو اړتیا په اساس جوړ کړی وو چې تر (۱۰۰۰) پورې دوکانونه، مسجد، دیني مدرسه، پکې تأسیس شوي، کلنیک، ښونځي، پارک او نور لوازم يې هم په پلان کې وو.
د طالبانو د ویاند له قوله؛ د ښارګوټي ټول اماکن ولسي خلکو په خپلو پيسو آباد کړي او چاری يې هم د سیميزې شورا لخوا چې محلي سپين ږيري اومشران په کې ونډه لري، پرمخ بیول کیدې.
د نوموړي په وینا؛ ګډوځواکونو د دې لپاره چې دا سیمه د مجاهدینو په کنترول کې وه او د ښارګوټي دجوړولو زمینه د ولس د اسانتیا لپاره مجاهدینو مساعده کړی وه نو په همدې اساس نن ورځ دولني ځواکونو د بهرنیانو په ملتیا د بازار نړولو او تخریب ته مټې بډ وهلي، ماشینونه يې راوستي، د بازار چوک او ګڼ ځایونه يې نړولي او د خلکو د دوکانونو په تخریب بوخت دي.
مجاهد ویلي ، که چیرې دغه اداره د خلکو استازې وای او یا يې د خلکو د ژوند او ښيرازې په اړه فکر درلودای نو د ولسي خلکو په سرمایه د جوړ بازار چې صرف عام ولس ته يې ګټه رسیږي نړول څه معنا لري او د کوم هدف لپاره دغه ډول جنایت ترسره کیږي؟ ››
طالبانو د دې په خاطر چې د دې کار سلګونه میلیونه افغانۍ زیان یواځې ولسي خلکو ته اوښتی په رسنیو هم غږ کړی چې د سیمې خلکوته د زیان د مخنیوي لپاره باید بې پرې راپورونه خپاره کړي .
او په وینا یې چې “د دغه ناځوانمردانه او بزدله عمل د مخنیوي لپاره خپل افغاني مکلفیت ادا کړي“
د تخار د والي ویاند ویلي چې همدا اوس یې دولسي خلکو لخوا دجوړ شوي ښارګوټي د نړولو چارې پیل کړې او ژر به یې له منځه یوسي.
ځینو رسنیو بیا دحکومتي چارواکو له قوله خبر ورکړی چې حکومت پلان لري د طالبانو له لوري په ټولو رغنیزو چارو کې د ونډې اخیستلو مخنیوی وکړي ترڅو هغوی په دې توګه ولسي محبوبیت ترلاسه نکړي.
سرچینو ویلي چې د وزیرانو په شورا کې ویل شوي چې امنیتي ځواکونه باید د طالبانو لخوا په کندوز کې د لویو استنادي دیوالونو، پلونو او نورو رغنیزو چارو مخه ونیسي .
د شنونکو په وینا؛ حکومت او نړیوال غواړي چې طالبان خلکو ته یواځې جنګیالۍ او ترهګره ډله وروپیژني او د راتلونکي لپاره خپلې ټولې رغنیزې چارې امریکایانو ته منسوبې شي.
د یادونې ږړ ده چې طالبانو په وار وار ویلي چې دوی د رغنیزو چارو ملاتړ کوي او ونډه په کې اخلي خو په خبره یې چې دحکومت ځینې استخباراتي کړۍ په لوی لاس د دوی د بدنامۍ هڅې کوي.
د پیښو څارونکي په دې اند دي چې د حکومت له خوا د ولسي خلکو په لګښت جوړ شوی د یوه لوی بازار نړول چې ټول زیان یې ولسي وګړو ته دی، ښایي ستر غبرګونونه له ځانه سره ولري
