(کابل ټکی کام، ۱۳۹۶، سلواغې ۲۴) د روسيې په تومسک ايالت کې د يوې پوځي چورلکې د سقوط له کبله شپږو تنو روسي پوځيانو ته مرګ ژوبله اوښتې ده.
د دغې هېواد د بېړنيو چارو وزارت چارواکي وايي، پېښه تېره ورځ ختيځې سايبريا ته څېرمه د تومسک ايالت کې رامنځته شوې ده.
چارواکي وايي، دغه (می ۸) چورلکه د پوځ اړوند وه او د نسکورېدو پر مهال پکې شپږ تنه سپاره و.
د بېړنيو چارو وزارت د معلوماتو پر اساس، د دغې چورلکې د نسکورېدو له کبله دوه تنه وژل شوي او څلور نور ټپيان دي.
تر اوسه د چورلکې د نسکورېدو لامل نه دی په ډاګه شوی خو چارواکي وايي پلټنې پيل کړي دي. ويل کېږي لوېدلې چورلکې لومړی د بېړنۍ ناستې هڅه وکړه او وروسته نسکوره شوه.
دا په داسې حال کې ده، چې وړمه ورځ هم د روسيې په پلازمينه مسکو کې يوې سترې مسافر وړونکې الوتکې سقوط وکړ چې له کبله یې ۷۱ کسان ووژل شول.
