(کابل ټکی کام ۱۳۹۶ سلواغه ۲۷ فرید افغان)
د ناټو سرمنشي ینس ستولتنبرګ چې تیره ورځ یې په بروکسل کې د ناټو د غړیو هیوادونو د دفاع وزیرانو په یوه غونډه کې خبرې کولې وویل؛ په دې فکر رسیدلي یو چې افغان جګړه له یوې سالم جوړجاړي پرته هیڅ نظامي حل لاره نه لري.
ستولټنبرګ داسې مهال دا خبرې کوي چې تیره ورځ یې افغانستان ته د زرګونو نورو عسکرو د استولو ژمنه هم وکړه، ترڅو د طالبانو سره په مخامخ جګړو کې ونډه واخلي.
نوموړی وویل؛ “رښتیا هم له سیاسي جوړجاړي پرته دا جګړه نه ختمیدونکې ده خو په دې باور لرو چې که د دې هیواد پوځیان ښه وروزل شي وضعیت به څه ناڅه کابو کړای شي“.
که څه هم په افغانستان کې د القاعده ډله شتون نلري او د داعش ډلې نسبت هم تر ډیره امریکا او نورو لویدیځو سازمانونو ته کیږي خو د ناټو سر منشي له دې جګړې تعبیر بل ډول وکړ او زیاته یې کړه ؛ تر هغو چې نړیواله ټولنه په افغانستان کې وي القاعده او داعش به بریالیتوب ته پرې نږدي.
نوموړی امریکایی ولس ته د طالبانو د وروستي لیک په تړاو وویل؛ له هر هغه اقدام نه چې له جګړو پرته سیاسي جوړجاړی پکې نغښتی وي ملاتړ کوي، خو په وینایې چې طالبان به د جګړو له لارې بریا ترلاسه نه کړي.
دیادونې وړ ده چې په کابل کې د ناټو مرکزي قوماندانۍ هم دطالبانو لیک ته په غبرګون کې ویلي و، چې د خپل حضور پای ته رسولو پلان نلري.
طالبانو تیره ورځ په یو بیساري اقدام کې امریکایي ولس ته یو اوږد وضاحت لیک استولی و، او له هغوی یې غوښتي و چې پر خپل حکومت فشار راوړي ترڅو په افغانستان کې خپل “اشغال“ ته دپای ټکی کیږدي .
دا لیک چې په لویدیځو رسنیو کې یې پراخ رسنیز پوښښ خپل کړ ډیر غبرګونونه له ځانه سره درلودل.
طالبانو چې په دې لیک کې افغان حکومت یو بلواکه ګوډاګی دولت یاد کړی و، په لومړي سر کې یې هم د ارګ د ویاند غبرګون راوپاراوو، او د امریکا د دفاع وزیر یې هم په اړوند توند دریځ درلود
