(کابل ټکی کام، ۱۳۹۶، کب ۸) د بلخ ولايت اوسېدونکي وايي، په دغې ولايت کې هدفي وژنې، وسله والې غلاوې او جنايي پېښې زياتې شوي چې د ښار امنيت يې خراب کړی او خلک يې اندېښمن کړي دي.
د بلخ د پوليسو مرستيال عبدالرزاق قادري وايي، وړمه ورځ د مزار ښار په درېيمه ناحيه کې له يوه سوداګر نيکزاد عثماني څخه غلو ميليونونه پيسې اخيستي او هغه يې وژلی دی.
نوموړی زياتوي، دغې سوداګر له کابل څخه مزار ته درې ميليونه او څلور لکه ډالره له ځان سره لېږدول چې کور ته پر لاره د هايلکس موټر سپرو وسله والو غلو له لوري پرې ډزې وشوې ووژل شو او پیسې يې ترې يوړل شوې.
د قادري په خبره، د دغې سوداګر د وژنې په تړاو څلور کسان نيول شوي او څېړنې ترې روانې دي.
د بلخ د پوليسو مرستيال قادري وايي، مزار ښار کې هدفي وژنې ډېرې شوي زياتوي چې د دلوې د مياشتې له لومړۍ نيټې تر دې دمه اتلس هدفي وژنې ثبت شوي دي.
په عين حال کې، د مزار ښار اوسېدونکي هم د ښار د روان وضعيت په اړه اندېښنه څرګندوي وايي، چې هره ورځ د وسله والو غلو له لوري يو تن وژل کېږي.
دوی وايي، د هدفي وژنو سربيره د موټرسيکل سپرو وسله وال غله، د مبايلونو غلاوې د موټرو نمبرونه پټول او زياتې جنايي پېښې کېږي چې پوليس يې هم د مخنيوي لپاره پوره هڅه نه کوي.
