تبصره
د نورو بهرنیو پوځونو د رالېږلو او هم د افغان پوځ په موجودیت کې دفاع وزارت تراوسه په دی ونه توانېد چې په هېواد کې له طالبانو نیول شوې سیمې بېرته ونیسي او موجوده نظام د ورځ په ورځ مخ په زیاتېدونکو ناامنیو له امله له سقوطه وژغوري.
دفاع وزارت له طالبانو سره د مقابلې لپاره بله لار نه لري ځکه یې د نور پوځ په جوړولو هڅې پیل کړې دي. دفاع وزارت به د نور پوځ په جوړولو دمخه لاس پکار شوې وای خو په امنیتي مسئولینو کې داخلي اختلافاتو یې مخه نیولې ده. په دفاع او کورنیو چارو وزارتونو کې یو شمېر چارواکي وايي، پر ځای د دې چې نور پوځ جوړ کړل شي او پرې پراخه ډالري لګښتونه وشي، غوره به دا وي چې همدا شته پوځ له طالبانو سره د جګړې پر مهال په خپل وخت اکمال کړل شي.
دفاع وزارت د جمهوري ریاست د جوړې شوې طرحې له مخې پر دی کار کوي چې په هېواد کې د لیرو پرتو سیمو د لاسته راوړلو لپاره نور ځوانان وګماري او دا پروسه ګړندۍ کړي. خو هغو ستونزو ته په کتو چې د ملي اردو پر وړاندې پرتې دي فکر نه کېږي چې دفاع وزارت به د جمهوری ریاست لخوا په نوې طرحه کې کامیاب شي.
د نوي منطقوي پوځ لپاره دفاع وزارت درې پړاوونه په نظر کې نیولي دي څو په درې واړو پړاوونو کې د اړتیا وړ ۳۶ زره کسیز پوځ پوره کړل شي.
د جمهوري ریاست لخوا د منطقوي پوځ د جوړولو یوه موخه دا ده چې د اروپايي هېوادونو په لوري له هېواده د وتونکو ځوانانو مخه ونیسي او هم د منطقوي پوځ په جوړښت ملي اردو غښتلې کړي.
د دفاع وزارت د ویاند، دولت وزیري، په وینا، د منطقوي ځواکونو دا طرحه د افغانستان د جمهوري ریاست لخوا تایید شوې او دفاع وزارت يې تطبیق ته هڅې پیل کړي دي، چې په راتلونکي نږدي وخت کې به د منطقوي پوځ لپاره نوي ځوانان وګمارل شي.
د منطقوي پوځ د جوړښت لپاره هغه ځوانانو ته اړتیا ده چې لوستي وي او هم پوځي تجربه ولري. دفاع وزارت په نظر کې لري هغه ځوان وګماري چې دمخه یې پوځې زده کړې کړې وي.
دفاع وزارت که د ملي اردو له تښتېدلو عسکرو منطقوي پوځ جوړوي نو سر له اوسه یې دا هڅه ناکامه ده، ځکه هغه چې دمخه له ملي اردو تښتېدلي دي، هغه ټول په نشه يي توکو روږدي بداخلاقه کسان دي چې د همدې ستونزو په لرلو له ملي اردو تښتېدلي دي.
که دفاع وزارت نوی منطقوي پوځ په ولایاتو کې د ځینو سیمو له طالبانو د تصفیې په موخه جوړوي نو سر له اوسه دې دا ومني چې طالبان به د تصفیې پر ځای نور هم حضور پیدا کړي او ګمارل شوی منطقوي پوځ به یې طالبانو ته په تسلیمېدو تصفیه کړل شي.
