راپور تاژ: فرید افغان
(کابل ټکی کام ۱۳۹۶ کب ۱۷ )
کابو یوه میاشت کیږي چې د افغانستان په مختلفونقاطو کې د ولسي وګړو پرضد عملیات، شپینۍ چاپې، مخامخ بریدونه او آن په قصدي توګه پرې بمبارۍ کیږي.
که ارګ امریکایانو ته د ورکړي قضایي مصؤنیت له کبله غبرګون نه شي ښودلی نو د خپلو افغان ځواکونو له خوا یې هم پر ولسي خلکو بریدونه نه دي غندلي.
نړیواله ټولنه، بشري حقوق، مدني فعالان او ټول بنسټونه په افغانستان کې د هدفي ملکي وژنو په باب چوپه خوله دي.
تیره ورځ مې د غزني د دریدلو مظاهره چیانو خبرې اوریدې چې ویل یې د امنیې قوماندانۍ د هغو قاتیلینو د نیولو په خاطر چې څو ورځې وړاندې یې په قصدي توګه پر ملکيانو برید وکړ، ځواکونه استولي خو داچې هغوی ټول مسلح و، د د نیولو وس یې نه درلوده.
نو په داسې حال کې به ولس ولې پاڅون ته نه اړ کیږي؟
راځئ دلته څو بوږنونکې پیښې یادې کړو چې څومره په سختو شیبو کې قرار لرو
لرې نه ځو یواځې د تیرو څو اونیو محدودې بیلګې دلته ذکر کوو
د فبروري پر لومړۍ نیټه افغان ځواکونو د کندهار ولایت د بند تیمور سیمه کې د بهرنیانو په ملتیا عملیات پیل کړل چې پکې ۳۵ ولسي وګړي ووژل شول، د ملي یووالي د حکومت مشر دا برید دکابل د پیښو غچ بللی و، خو د بشري حقوقو ادارې یې په اړوند ویلي و، چې په یاد برید کې غوڅ اکثریت قربانیان ملکیان دي او زیاته کړې یې وه چې په یادو عملیاتو کې ولسي کسان په هدفي توګه په نښه شوي او دڅیړنو غوښتنه یې هم کړې وه.
دفبروري په ۸مه دخوست ولایت دعلیشیرو ولسوالۍ په بټۍ تاڼې سیمه کې دکمپاین عسکرو دیوې کورنۍ اووه تنه غړي ووژل چې دخوست دامنیه قوماندانۍ دامنیت امر عبدالحنان ځدران هم تائید کړې وه چې په نښه شوي خلک ملکي وګړي دي.
د فبروري په ۱۹مه د خوست ولایت دصبریو ولسوالۍ په څپري او میچي سیمو کې ګډوځواکونو دچاپې په مهال څلور تنه ولسي وګړي شهیدان کړل.
د فبروي په ۲۱مه د لوګر ولایت دڅرخ ولسوالۍ د پنګرام سیمي په قلعه بالا کلي کې افغان ځواکونو دچاپې او بمبار په مهال درې تنه ملکيان په مخامخ ډزو ووژل.
د فبروري په ۲۴مه د فراه ولایت د بالابلوک ولسوالۍ په ګنج اباد کلي کې ګډوځواکونو په بمبار کې لس تنه ولسي وګړي شهیدان او شل نفره ټپیان شول.
اونۍ وړاندې په خوست کې کمپاين ځواکونو د نادرشاه کوټ ولسوالۍ په زني خېلو سيمه کې په يوه کور عمليات وکړل، چې په ترڅ کې يې د يادې کورنۍ د يوې مېرمنې، يوې ماشومې انجلۍ په ګډون څلور تنه عام خلک ووژل.
همدا راز تیره اونۍ د کندهار د میوند په بند تیمور سیمه کې دولت ته وفادارو ځواکونو د ماشومانو په ګډون ۶ تنه ولسي وګړي ووژل او ګڼ نور یې ټپیان کړل .
سرچینې زیاتوي؛ په دې عملیاتو کې د کلیوالو ۱۵ موټرسایکلان او یو موټر سوځول شوي او ۳۰ تنه ولسي خلک یې له ځانه سره د بندیانو په توګه وړي دي.
څو ورځې وړاندې بیاد غزني ولايت په قره باغ ولسوالۍ کې د نيختي کلي سيمه ييزو پوليسو د شېراباد کلي پر يوه کور بريد وکړ او د يوې کورنۍ دوه تنه يې ووژل، دوه نور يې ټپيان کړل او ۲ تنه يې له ځان سره يوړل.
همدا پرون ورځ افغان ځواکونو په مخامخ ډزو کې ۳ وروڼه او یو بل کلیوال ځای پر ځای ووژل ، د کلیوالو د عراده جاتو د سوځیدو سربیره یې یو کاریز هم په بمونو والوزاوو.
دې پیښو ته حکومت کوم رنګ ورکوي؟
د کندهار بندتیمور سیمه کې لویې فاجعې ته د ګډحکومت مشر اشرف غني د کابل د برید د غچ اخیستنې نوم ورکړ او په وینا یې چې ټول وژل شوي خلک طالبان دي خو د بشري حقوقو سپیناوي بیا دا ادعا څه ناڅه بې ارزښته کړه.
د غزني پیښې ته یې د قومي شخړې نوم ورکړ، حال داچې ولسي خلک یواځې د اربکیانو پرضد راپاریدلي و.
پر خوست ځکه چوپتیا غوره شوې چې حکومت په څرګنده مني چې د کمپیان په نامه ملیشې یې په واک کې نه دي.
هدف څه ده؟!
حکومت پلان لري له هرې ممکنه لارې پرطالبانو فشار زیات کړي.
داچې د طالبانو د تمویل او تجهیز یواځنۍ مراجع ولسونه دي نو حکومت پکې د ویرې خپرولو په خاطر په مختلفو لارو هغوی هڅوي ترڅو د طالبانو له ملاتړ لاس واخلي.
امریکایانو ژمنه کړې چې د طالبانو مالي مراجع به ختموي او خبرداری یې ورکړی چې ښایي په افغانستان کې د ولسي خلکو مرګ ژوبله نوره هم زیاته شي .
نو له همدې کبله دوی کوښښ کوي تر څو په ولسونو کې د طالبانو محبوبیت له همدې لارې کمزوری کړي.
