دوهم تعقيب: د کابل بريد کې بهرنيو روزونکو ته مرګ ژوبله اوښتې
(کابل ټکی کام، ۱۳۹۶، کب ۲۶) نن سهار د کابل ښار نهمې امنیتي حوزې مربوط د سرک نو سيمه کې د امريکايي روزونکو پر یوه موټريز کاروان سرتيری بريد کې بهرنيو روزونکو ته مرګ ژوبله اوښتې ده.
د کورنيو چارو وزارت د وياند مرستيال نصرت رحيمي وايي، برید د يوې بهرنۍ کمپنۍ په کارمندانو شوی خو نوموړي هغوی ته د اوښتې مرګ ژوبلې په اړه له څه ويلو ډډه کړې.
نوموړی وايي، په دې بريد کې دوه موټر زيانمن شوي دي.
عيني شاهدان وايي، سرتيري بريدګر په سيمه کې د يوې بهرنۍ کمپنۍ استادان په نښه کړي چې افغان ځواکونو ته يې روزنه ورکوله.
طالبانو د بريد مسئوليت منلی او وياند يې ذبيح الله مجاهد په لومړنيو معلوماتو کې ويلي، بريد د بهرنيو روزونکو په موټريز کاروان شوی چې له کبله يې د بهرنيو ځواکونو يو موټر په بشپړه توګه ويجاړ شوی او پکې (ټول سپاره بهرني اشغالګر ) وژل شوي دي.
په ټولنيزو رسنيو د بهرنيو ځواکونو د هغه موټر انځورونه خپاره شوي او پکې ښکاري چې موټر ويجاړ شوی او اور پرې بلېږي.
