(کابل ټکی کام ۱۳۹۶ کب ۲۷ فرید افغان)
ارګ د بلخ له والي سره لویې معاملې ته یوځل بیا تیاری ښودلی ترڅو نوموړی ژر تر ژره دنده پریږدي او د ارګ له منځه تللی حیثیت بیرته اعاده شي.
که څه هم عطانور تر دې وړاندې ویلي و، چې غوښتنې یې د معاملې له اړخه نه بلکې د شویو ژمنو د نه پوره کیدو له امله دي خو یک تلویزیون ته یې سرچینو ویلي؛ چې ارګ له عطانور سره په ځانګړې توګه دې توافق ته رسیدلی چې عطانور ته به د پوهنې او یو بل وزارت چې لا هم څرګند نه دی ورکول کیږي.
د سرچینې له قوله عطانور د پوهنې د وزارت ته سر له اوسه خپل وزیر نجیب آقافهیم او د بل نامعلوم وزارت لپاره میرویس بلخي ټاکلي.
عطانور همداراز د بلخ ولایت ته په خپله خوښه اسحاق رهګذر ټاکلی چې ښایي د راتلونکي کال په لومړۍ اونۍ کې دا معامله رسمي بڼه خپله کړي.
تر دې وړاندې عطانور د انتخابانو په خپل وخت ترسره کول، د لویې عنعنوي جرګې راغوښتل، په اساسي قانون کې تغیر او دجانکیري د پریکړې سره سم د واک نيمول غوښتي و چې، ارګ ورسره نه منل او د بلخ او ارګ ترمنځ دا سیاسي شخړه تر ۳ میاشتو وغځول شوه.
