(کابل ټکی کام، ۱۳۹۶، کب ۲۸) طالبانو پرون ناوخته له تاجکستان څخه کابل ته واردېدونکې برېښنا په کندوز ولايت کې پرېکړې او تازه د (اسلامي امارت د برېښنا ادارې) له لوري په دغې تړاو يوه اعلاميه خپره شوې چې پکې د خلکو د ستونزو د حل په موخه غوښتنې شوي دي.
د برېښنا ادارې له لوري په خپره شوې اعلاميه کې راغلي، چې له تېرې ډېرې مودې راهيسې د امريکايانو او دولتي ځواکونو له لوري په هغو خلکو ظلمونه کېږي چې د طالبانو تر ولکې لاندې سيمه کې ژوند کوي، د عامو خلکو پر ميشت ځايونو، مدرسو، بازارونو، روغتيايي مرکزونو شپني عمليات کوي او په قصدي ډول يې بمباري کوي.
اعلاميه زیاتوي، (کله بیا په دغو سیمو کې د تعلیم او تربيي، بريښنا، صحت او نورو خدماتو د وړاندې کولو مخه نیول کیږي، دا چې اسلامي امارت د خپلو خلکو د ټولو حقوقو د ساتلو مسئولیت لري، نو اجازه به ورنه کړي چې تر کنترول لاندې سیمو کې يې خلک قصدا د دښمن لخوا مشکلات وګالي).
د برېښنا ادارې ويلي، دغه اقدام يې د دولت له خوا د کندز او بغلان په ولايتونو کې د برېښنا او نورو خدمتونو د مخنيوي په غبرګون کې کړی او تر هغې چې بېرته په يادو سيمو کې منظورې شوې پروژې پيل شوي نه وي تر هغې به په کابل به هم برېښنا بنده وي ځکه (د خارجي یرغلګرو او کورنیو دښمنانو ټول غټ مرکزونه، نظامي قطعات او استخباراتي ځالي پکي دي، ترڅو د خلکو ستونزې درک کړي او د خپلو ناکامیو انتقام له عام ولس څخه وانخلي).
په اعلاميه کې د خلکو غوښتنې په لاندې ډول ذکر شوي دي:
۱ــ د کندز ولایت د چهاردرې ولسوالۍ اړوند د بريښنا ستونزه باید هر ژر حل شي، د برق مزي ترميم او برق يې بیرته تقويه کړل شي.
۲ــ د ګل تيپې د ساحې د برق مشکل دې فعلا داسې حل شي چې د تلوکی له سیمې څخه ورته بريښنا ورسول شي.
۳ــ کله که د بريښنا په شبکه کې کوم مشکل رامنځته کیږي باید په عاجل ډول رسیدګي ورته وشي او ستونزه رفعه شي.
۴ــ څو ورځې وړاندې د مرکز اړوند کنم سیمه کې د برق جریان قطعه شوی کله چې د برق د جوړیدو لپاره د برق اینجینر واستول شو د دښمن لخوا په ډزو شهید کړل شو، باید بیا داسې پيښه تکرار نشي.
۵ ــ څو ورځې وړاندې د چهار درې په ولسوالۍ کې د ځينو سیمو څخه بريښنا قطعه شوې، کله چې د سیمو سپين ږیرو د برق د ترمیم غوښتنه کړې وه، د کابل ادارې د مسئولینو لخوا تهدید شوي وو، چې باید بیا داسې څه تکرار نشي.
د بغلان په ولایت کې د خلکو ستونزې:
۱ــ د پلخمري ولسوالۍ د دهنه غوري سیمې برق قطع شوي باید د خواجه الوان سیمې څخه بیرته بريښنا ورکړل شي.
۲ــ د عمر خیلو اکا خیلو د سیمو د بريښنا رسولو منظوري ورکړل شوي، خو د کار مخه يې نیول شوي باید عاجل اجازه ورکړل شي.
۳ــ د بالادوري مکتب او بي بي آئینه سیمو کې د ټرانسپرمرونو او لینونو ستونزې پيدا شوي چې باید حل کړل شي.
۴ـــ له هغو سیمو څخه چې ټرانسپرمرونه د ترمیم لپاره وړل شوي باید ترمیم او بیرته خپلو سیموته ورسول شي.
ترهغو چې د خلکو پورته مشروع غوښتنو ته پاملرنه ونشي اسلامي امارت هم د خپل ولس په غوښتنه په کابل باندې بريښنا قطع ساتي، مسئولیت يې د کابل ادارې چارواکوته راجع دي.
