لاروی
د لندن طبپوهانو د بېلابېلو مرضونو د مخنیوي لپاره د واکسینو د ستنې پر ځای ګولۍ جوړې کړې دي. د واکسین ستنې له ویرې به ډېر ماشومان له واکسینو محرومېدل او هم به یې په ډېره ژړا واکسین کاوه.
په لندن کې طبپوهانو اوس یو ډول ګولۍ جوړې کړې چې د واکسینو پر ځای ترې کار اخیستل کېږي او هم یې ماشوم ته په ورکړه کې کومه ستونزه نه لیدل کېږي.
په لندن کې د طبپوهانو لخوا نوې د واکسین پر ځای ګولۍ د عامو مرضونو د درمل په څېر دي او په ډېره اسانتیا ماشومانو ته ورکول کېدای شي.
له بلې خوا نړیوالو طبپوهانو په لندن کې د جوړو شویو واکسین ګولیو په اړه خوښي ښودلې، ویلي یې دي هغو سیمو ته چې د امینتي ستونزو له امله واکسیناتوران نه شول ورتلای، اوس سیمو ته ګولۍ په اسانۍ رسېدای شي او د ډول ډول مرضونو مخه به د ګولیو په وسیله ونیول شي.
د لندن طبپوهان له څو کلونو راهیسې په دې هڅه کې وو چې په دا ډول ګولیو جوړولو کامیاب شي. خو د طبپوهانو په نظر، پر دې هم غور پکار دی چې لومړی باید د ماشوم معده هم په نظر کې ونیول شي چې د واکسین د ګولۍ د هاضمې توان لري او که نه. که یې نه لري، باید د ماشوم معده وکتل شي او بیا ورته د واکسین ګولۍ ورکړل شي.
