(کابل ټکی کام، ۱۳۹۶، کب ۲۹) شاوخوا څلور ورځې مخکې د هرات پخواني والي او د پخواني جهاد مشر اسمعيل خان په يوه غونډه کې، د دولت مخالفو وسله والو ته بلنه ورکړه ترڅو له پخوانيو مجاهدينو سره د سولې اړوند خبرې وکړي.
اسعميل خان وويل، که طالبان له حکومت سره د خبرو اراده نه لري نو د پخوانيو مجاهدينو سره دې مخامخ خبرې وکړي ترڅو افغانستان کې روان ناورين پای ته ورسېږي او په ګډه به په هېواد کې يو شرعي نظام قايم کړي.
تازه د اسعميل خان خبرو ته طالبانو غبرګون ښودلی او وياند يې ذبيح الله مجاهد کابل ټکی کام ته په رالېږلې خبرپاڼه کې ويلي، (اسلامي امارت اساسا د ټولو هغو هڅو هرکلی کوي چې د هیواد د روانې لانجې د واقعي هواري په اړه تر سره کیږي).
د ښاغلي مجاهد په خبره، د تېرو اوولسو کلونو په موده کې د پخواني جهاد مشران د (اسلامي امارت مشرتابه په خپلو پيغامونو کې په درنښت مخاطب کړي) او له هغوی يې په روان جهاد کې د ورګډېدو غوښتنه کړې، په وينا يې (اشغالګر) هيڅکله افغانستان او افغانانو ته د خير رسولو اراده نه لري.
طالبان وايي: (د اشغالګرو د اشغالګرانه هڅو له امله هیواد ورځ تر بلې د بحران خواته بیول کیږي او نن دوی خپله هم دا حقیقت درک کړی چې اشغالګران د افغانستان د جوړولو په پلمه د هغه د تباه کولو په لټه کې دي.)
طالب وياند وايي، دا چې اسمعيل خان د پخوانيو جهادي مشرانو په استازولۍ له دوی څخه د خبرو او يوې هوکړې ته د رسېدو غوښتنه کړې زياتوي چې (اسلامي امارت هر هغه چاته چې د دغې غمیزې چې د هیواد اشغال دی دپای ته رسیدو لپاره هلې ځلې کوي او د اشغالگرو حمایت نه کوي هغه که جهادي شخصیتونه وي اویانورڅوک، ټولوته بلنه ورکوي چې د اسلامي امارت له سیاسي دفتر سره د تفاهم لپاره وویني ترڅو په افغانستان کې د بهرني اشغال د خاتمي، اسلامي نظام د حاکمیت او سولې د لارو چارو په اړه خپل نظریات سره شریک کړي).
د يادونې ده، چې د کابل پروسې په وروستۍ ناسته کې ولسمشر غني له طالبانو د سولې او مذاکراتو غوښتنه وکړه خو طالبانو تر اوسه په دې اړه غبرګون نه دی ښودلی.
