غني: زر مکتبونه تړل شوي او پنځوس سلنه ښوونځي ودانۍ نه لري
(کابل ټکی کام، ۱۳۹۷، وری ۴) ولسمشر غني نن د نوي ښوونيز کال د پيلېدو په يوې غونډې کې وويل، چې په هېواد کې لا هم پنځوس سلنه ښوونځي ودانۍ نه لري او زر مکتبونه تړل شوي دي.
نوموړي وويل، که څه هم د ښوونکو شمېر مخ پر ډېرېدو دی خو زياته يې کړه په مکتبونو کې نيمايي ښوونکي په معياري ډول د تدريس چارې پر مخ نه شي وړلای او د ښوونې لپاړه اړين معلومات نه لري تر څو يې زده کوونکو ته وړاندې کړي.
د غني په خبره، په هېواد کې لا هم درې نيم ميليونه ماشومان ښوونځيو ته نه شي تللی په وينا يې راتلونکي دوه کلونه به د افغان زده کوونکو د ښوونې او بدلون کلونه وي ځکه په وينا يې چې (تر راتلونکو دوو کلونو پورې به د دوه سوو میليونو ډالرو په ارزښت د شپږو زرو ښوونځیو لپاره نوې ودانۍ جوړې شي) .
نوموړي د نوي تعليمي کال د مراسمو جوړې شوې غونډې ته په خپلې وينا کې وويل، د پوهنې وزارت بايد له سياسته ليرې او مسلکې شي او له هر ډول فساد څخه پاک وي په خبره يې: “څوک چې زموږ له ماشوم او معلم څخه غلا کوي، دا کفر دی او دا د زغم وړ نه ده.”
په عين حال کې د پوهنې وزارت وايي، سږ کال به يوويشت زره ښوونکي وګماري او د ښوونځيو لپاره به پنځوس ميليونه ټوکه نوي کتابونه هم چاپ او وويشل شي.
دا په داسې حال کې ده، چې تېره ورځ د هلمند ولايت د پوهنې رئيس داود شاه رسنيو ته وويل، د دغې ولايت له دېرشو ښوونځيو د ملي اردو ځواکونه د سنګر په توګه استفاده کوي او ډيری ښوونځي چې د طالبانو او دولتي ځواکونو تر منځ په جګړو کې ويجاړ شوي لا هم نه دي رغول شوي.
