(کابل ټکی کام، ۱۳۹۷، وری ۵) څو ورځې مخکې په افغانستان کې د امريکا او ناټو ځواکونو عمومي قومندان جنرال نيکولس له بي بي سره په خبرو کې وويل، چې روسيه د طالبانو د مالي ملاتړ سربيره له هغوی سره د وسلو د ورکړې مرسته هم کوي چې د تاجکستان له لارې په قاچاقي ډول راوړل کېږي او طالبانو ته سپارل کېږي.
خو تازه روسيې د جنرال نيکولس دغه څرګندونې رد کړي او دا يې يوه بې اساسه ادعا بللې ده.
په کابل کې د روسيې د سفارت له لوري په يوې خپرې شوې خبرپاڼه کې راغلي، امريکايي چارواکي په دوامداره توګه ځانونو ته د دې حق ورکوي چې په ښکاره ډول بې اساسه ادعاګانې وکړي.
د روسيې سفارت د نيکولسن په ځواب کې ويلي، چې امریکايي چارواکي بايد د دغې ډول تورونو لګولو لپاره له ځان سره د قناعت وړ ثبوتونه ولري.
په اعلاميه کې له امریکايي چارواکو غوښتنه شوې چې له دې وروسته دې له بې اساسه ادعاګانو څخه ډډه وکړي.
په دې وروستيو کې امريکايي چارواکي تور پورې کوي چې روسيه له طالبانو سره مالي او د وسلو مرستې کوي خو روسيې دغه تورونه په وار وار رد کړي دي.
تر اوسه په ثبوت نه دي رسېدلي چې روسيې دې په افغانستان کې له طالبانو سره د وسلو مرستې کړي وي.
طالبانو تر دې مخکې په خپلو اعلاميو کې ويلي، چې دوی د افغان او ناټو ځواکونو پر وړاندې په جګړو کې له پخوانۍ روسۍ سلاګانو او له افغان ځواکونو څخه په نيولو وسلو او مهماتو جګړه مخته وړي.
