د ارزګان ولایتي شورا او عام وګړي: دولتي ځواکونه د ولسي خلکو پرضد عملیات کوي
(کابل ټکی کام ۱۳۹۷ وری ۱۳)
د اروزګان ولایت ځایي اوسیدونکي وایی چې دولتي ځواکونو یې په سیمه کې د وسلوالو مخالفینو په نامه د ولسي خلکو پرضد عملیات پیل کړي .
دا اوسیدونکي چې شمیر یې لسګونو ته رسیده تیره ورځ د اروزګان د ولایت مقام ته د اعتراض په ډول ورغلي و او له چارواکو یې غوښتل چې نور دې خپل ځواکونه خپلسریو ته نه پریږدي.
د دې ولایت د ولایتي شورا ريیس امیر محمد بارکزى هم د ولسي خلکو خبرې تائیدوي او زیاتوي چې امنیتي ځواکونو د ولسي خلکو کورونه نړولي ، هغوی یې سخت ځورولي او کوم پرمختګ یې هم نه دی کړی.
ولایتي شورا وایی؛ د دې ولایت امنیتي مسؤلینو یواځې د امتیاز راوړلو په خاطر دا عملیات پیل کړي تر څو هغه ځورول شوي ولسي خلک چې کورنه یې نړیدلي یا هم نور زیانونه ور اوښتي ،رسنیو ته د وسلوالو په نوم معرفي کړي.
امنیتي چارواکو د معترضینو دې غوښتنې ته هیڅ مثبت یا منفي ځواب نه دی ورکړی.
دا په داسې حال کې ده چې څو ورځې وړاندې هم د دې ولایت د امنیت آمر ویلي و، چې د ښار په منځ کې د پولیسو د خپلسریو مخه نه شي نیولی .
د ده په وینا چې پولیس د سیمیزو زورواکو ملاتړ له ځان سره لري او که یې پر وړاندې کومه کړنه ترسره کړي ژوند یې په خطر کې لویږي.
