هندي کشمير: د سرتيرو په ګډون شل تنه وژل شوي دي
(کابل ټکی کام، ۱۳۹۷، وری ۱۳) د هند تر ولکې لاندې کشمير سيمه کې د وسله والو او هندي ځواکونو تر منځ د نښتو له کبله شل کسان وژل شوي او لسګونه تنه نور ټپيان دي.
د شيش پال په نوم يوه امنيتي مسئول رسنيو ته ويلي، نښته هغه مهال رامنځته شوه کله چې هندي ځواکونو د وسله والو پر يوه استوګن ځي عمليات پیل کړل، پر مهال يې د وسله والو او هندي ځواکونو تر منځ جګړه پيل شوه.
ځايي سرچينې ليکي، پېښه د شوپيان ولسوالۍ اړوند سيمه کې شوې زياتوي چې د نښتې پر وخت د سيمې خلکو پر لاريون لاس پورې کړ چې هندي ځواکونو يې د پاشلو لپاره ډزې وکړې.
د دغې نښتو او شخړو په درې هندي سرتېري،ديارلس وسله وال او پینځه ملکي وګړي وژل شوي دي او ځينې کورونه هم د اورلګېدو له کبله سوځېدلي او ويجاړ شوي دي.
راپورو کاږي اوس هم په سيمه کې د وسله والو او هندي سرتيرو تر منځ خال خال ډزې روانې دي، د پوليسو په خبره ښايي مرګ ژوبله له دې هم زياته شي.
بل پلو ته سيمه ييزو بېلتون غوښتونکو نن د دوشنبې په ورځ د يوې لويې مظاهرې پلان تړلی او حکومت ټولې تعليمي، ملکي او حکومتي ادارو ته رخصتي ورکړې ده.
له بله پلوه امنيتي مسئولينو د بېلتون غوښتونکو له درېيو مشرانو ياسين ملک، سيدعلي ګیلاني، میر واعظر عمر فاروق باندې د بنديزونو لرې کولو اعلان کړی او ويلي يې دي له دې وروسته دغه مشران هرځای ته تللی شي.
