(کابل ټکی کام، ۱۳۹۷، وری ۱۹) د سرپل ولايت امنيتي مسئولين وايي، طالبانو په دغې ولايت کې د پوليسو په پوسته په بريدونو کې له ليزري وسلو کار اخيستی چې په ترڅ کې يې نهه پوليسو ته مرګ ژوبله اړولې ده.
د سرپل د امنيې قوماندانۍ د امنيت آمر سمونيار اسدالله حبيبي وايي، تېره شپه طالبانو د سيداباد ولسوالۍ مربوط پر يوه پوسته بريد کړی، چې په پايله کې يې شپږ سيمه ييز پوليس وژل شوي او درې تنه نور ټپيان دي.
نوموړی وايي، طالبانو د دغې پوستې په حمله کې ليزري وسلې کارولي او پوليس د ليزري وسلو په ډزو ويشتل شوي دي.
د طالبانو له لوري کابل ټکی کام ته په رالېږلې خبرپاڼه کې راغلي، چې بريد د يادې ولسوالۍ اړوند د تخته په سيمه کې د اربکيانو په پوستو شوی چې په ترڅ کې يې شپږ تنه وژل شوي او ځينې نورو له سيمې تېښته کړې ده.
خبرپاڼه زياتوي، په دې حمله کې يې له دولتي عسکرو اووه ميله سپکې او درنې وسلې او په زياته اندازه مرمۍ او پوځي توکي هم نيولي دي.
په عين حال کې د سرپل د ولايتي شورا غړي وايي، دا په تېرو درېيو ورځو کې څو يم وار شو چې طالبانو په پرمختللو وسلو بريدونه کوي او دولتي ځواکونو ته مرګ ژوبله اوړي.
وړمه شپه او د جمعې په شپه هم طالبانو د سرپل مرکز مربوط آدرينګ سيمه کې او د صياد ولسوالۍ له لوري په ځينو پوستو بريدونه کړي و چې په ترڅ کې يې ديارلس تنه عسکر وژل شوي و او يو شمير نور ټپيان و.
