(کابل ټکی کام، ۱۳۹۷، وری ۱۹) د پاکستان په پېښور ښار کې د منظور پښتون په مشرۍ د پښتون ژغورنې غورځنګ ستره غونډه روانه ده.
څو ساعته مخکې د دغې غورځنګ یو مشر محسن داوړ وويل، له چارواکو سره يې خبرې شوي تر دې دمه ورته هيڅ خنډ نه دی جوړ شوی او په ډاډه زړه به خپلې غونډې ته دوام ورکړي.
د داوړ په خبره، د ځينو ګوندونو مشرانو ورته ډاډ ورکړی چې د دوی ملاتړ به کوي او غونډې ته به يې خپل غړي ورلېږي.
دغه راز د ياد غورځنګ يو بل مشر منظور پښتون د خواله رسنيو له لارې له خپلو ملاتړو غوښتي، چې د نورو ګوندونو يا د ګوندو د غړو د مخالفتونو پر وړاندې غبرګون ونه ښي او يواځې خپل کار سره کار ولري چې صرف د ظلم خلاف غږ پورته کول دي.
د پېښور غونډې ته له تېرو څو ورځو راهيسې کمپاين روان و او له پرون راهيسې، له وزيرستان، بلوچستان، ډیره اسماعيل خان، خيبرپښتونخوا او د دغې هېواد له يو شمېر نورو سيمو سلګونه پښتانه ورټول شوي دي.
دغه ګوند تر دې مخکې هم په اسلام اباد کې پرلت وهلی و او د چارواکو له لوري ورسره ژمنه شوې وه چې غوښتنې به يې ومنل شي.
پښتون ژغورنې غورځنګ غوښتنه کوي چې د نقيب الله مسعود پر وژنې تورن کس ته دې سزا ورکړل شي، قبايلي سيمې دې له ماينونو پاکې، د پوځ پوستې دې کمې شي او په قبايلو سيمو کې له پېښو وروسته دې ګرځبنديز نه لګول کېږي.
بايد وويل شي، چې د پښتون ژغورنې غورځنګ په ملاتړ په افغانستان کې هم غونډې وشوې او په هېواد کې يې یو شمير سياسيونو د ملاتړ غږ وکړ.
