(کابل ټکی کام، ۱۳۹۷، وری ۲۰) څو ورځې مخکې د جوزجان امنيه قوماندان مل پاسوال فقيرمحمد”جوزجاني” ادعا وکړه چې په جوزجان جې د داعش ډلې عمومي مسئول د هوايي ځواکونو په بريد کې له يوه بل کس سره يوځای وژل شوی دی.
خو هغه مهال ځينو سرچينو ويلي و، چې قاري حکمت په هوايي بريد کې نه بلکې په خپله ډله کې د يو ملګري له خوا په سر ويشتل شوی او ژوند يې له لاسه ورکړی دی.
تازه اريانا نيوز ته يوې سرچينې ويلي، چې د قاري حکمت له وژل کېدو وروسته د ازبکستاني داعشيانو او د قاري حکمت پرځای د نوي مسئول قاري حبيب الله تر منځ نښته شوې، چې په ترڅ کې يې دوه ازبکستاني وسله وال وژل شوي دي.
د جوزجان د والي مرستيال عبدالرحمن محمودي هم د داعش وسله والو خپلمنځي نښته تاييد کړې ده.
د يادونې ده، چې د درزاب ولسوالۍ ځينې سيمې د داعش وسله والو تر ولکې لاندې دي چې وخت ناوخت پکې بريدونه ترسره کوي.
