له ځمکې ۲۰۰ میله پورته لوکس هوټل.. په ۲۰۲۲ز کال کې جوړېږي
د اورین سپېن په نوم کمپنۍ غواړي له ځمکې ۲۰۰ میله پورته یو لوکس هوټل جوړ کړي.
دا هوټل به، چې د ”ارورا سټېشن“ نوم ورکړل شوی، د ۲۰۲۱ز کال په وروستیو کې چمتو شي او په ۲۰۲۲ز کال کې به د دې جوګه وي چې پورته په فضا کې مېلمانه پکې واوسېږي.
په دې لوکس فضايي هوټل کې، د دوو خادمانو په ګډون، شپږ کسان د ۱۲ ورځو لپاره ځایېدای شي. د دې ۱۲ ورځني سفر لګښت به، د یوه سړي پر سر، نږدې ۹ نیم میلیونه ډالره وي، یا په بل عبارت، د یوې شپې مصرف به یې ۷۹۱۶۶۶ ډالره وي.
په دې ۱۲ ورځني فضايي سفر کې به د ارورا هوټل مسافرین د ځمکې له مخه ۲۰۰ میله پورته وي. دا هوټل به په هرو ۹۰ دقیقو کې د ځمکې شاوخوا یو چکر پوره کوي؛ مطلب دا چې، د هوټل شتمن مسافر به په ۲۴ ساعته کې نږدې ۱۶ ځله د لمر راختل او پرېوتل ویني.
مېلمانه په هوټل کې د وایرلیس له چټک انټرنیټه په استفادې سره له خپلو کورنیو سره په ژوندۍ بڼه خبرې کولای شي، په هوټل کې ازاد ګرځېدلای-راګرځېدلای شي، او، ځمکې ته د بېرته راتلو پر مهال به د اتلانو په څېر له ځانګړي هرکلي سره مخ شي.
فضا ته تر تر تللو وړاندې به مسافرین د اورین سپېن له هغو پخوانیو تجربه لرونکو کسانو درې میاشتنۍ روزنه ویني چې مخکې فضا ته تللي دي.
