(کابل ټکی کام ۱۳۹۷ وری ۲۴)
تیره ورځ د امریکا د استخباراتي ادارې سي آی اې مشر مایک پامپیو چې اوس د بهرنیو چارو وزارت ته نوماند دی د کانګرس په یوه استماعیه غونډه کې وویل چې په افغانستان کې به خپل فعالیت د وروستي ترهګر تر وژلو پورې روان وساتي.
تر هغه څو شیبې وروسته بیا د امریکا د پوځ لوی درستیز جنرال جوزف ډانفورډ وویل چې امریکایي ځواکونو ته یې د جګړو په ډګر کې عام وتام اختیارات ورکړي چې په خبره یې ، سږکال به د پریکنده جګړو لومړی فصل وي چې یا به طالبان سولې ته اړ کیږي او یا به له منځه وړل کیږي.
نوموړي ویلي ؛ امریکایي مشاورینو افغان ځواکونه په لوړ مرال روزلي او ټولو خلاوې یې ارزیابي کړې ترڅو راتلونکې مخ پر وړاندې جګړه وګټي.
د امریکا د دفاع وزیر جیمز متیس هم د طالبانو پر وړاندې د بریا ادعا وکړه او کانګرس ته یې وویل چې راتلونکی کال به د طالبانو د ماتې کال وي.
طالب ویاند ذبیح الله مجاهد د دریو واړو امریکایي چارواکو خبرو ته غبرګون ښودلی او ویلي یې دي چې دې چارواکو د افغان جګړې په اړه کانګرس ته غلط معلومات ورکړي او په خبره یې چې دا ټولې تکراري خبرې وې چې د ولس د تیر ایستلو او پر خپله ماته د پردې اچولو هڅه وه.
طالبانو د امریکایي چارواکو خبرې د افغان دولت له خوا ورکړل شوې فرمایشي څرګندونې بللې او زیاته کړې یې ده چې ‹‹ افغان چارواکو امریکایي چارواکو ته داخبرې د خپلې بقا او شخصي ګټو د خوندیتوب په خاطر ورکړي او دوی یې جنګ او په افغانستان کې پاتې کیدوته هڅولي ››
طالبانو خبرداری ورکړی چې دا جګړه به افغانان ګټي ځکه د دوی په وینا چې ولسونه پوهیږي چې د روان اشغال پر وړاندې د جګړو توندول د ستونزو یواځنی حل دی.
مجاهد ویلي “د اسلامي امارت مجاهدین خورا عالي روحیه لري، د پسرلي په دا کمو ورځو کې د هیواد په مختلفو برخو کې د دښمن پرخلاف د جګړو تیزي او هغوی ته درانه زیانونه اړول څرګندوي چې افغان مجاهدولس د بري په لور د خورا تیز حرکت په حال کې دی“
طالبانو ګواښ کړی چې “راتلونکی کال به د امریکایانو او د هغو د افغان معاش خورو لپاره خورا بد کال وي او هغوی به لا ډير ووژل شي“
پر همدې مهال الماني رسنیو د امریکایي جنرالانو ټولې ژمنې او دریځونه بې ګټې بللي او په یوه راپور کې یې د امریکایي جنرالانو غورزو پرزو ته تلویحي اشاره کړي.
په ۲۰۱۴ کال کې د امریکایي ځواکونو عمومي قوماندان جنرال جان کمپبل وویل؛ “په جګړه کې دبریا د راتګ لپاره زیات تغیرات ویني“ په ۲۰۱۳ کال کې جنرال جوزف دانفورد وویل “ د امریکایانو له بریا سترګې پټول نه دي پکار“
تر هغه وړاندې امریکایي جنرال جان آلن ویلي و “ موږ.کامیابیږو بریا زمونږه ده“
په ۲۰۱۱ کال کې جنرال ډیویډ پترایوس ویل “ د طالبانو خوځښت پر شا تلونکی او ماتیدونکی دی“
په ۲۰۱۰ کال کې جنرال سټنډي مکرسټال ویلي و “ اوس نو بریا راتلونکې ده“
په ۲۰۰۹ کال کې امریکایي جنرال مک کیرنان دا خبره ډیره تکراروله “ امریکا په افغان جګړه کې ماتې نه خوري“
خو ۱۷ کاله تیریږي چې د امریکایي ځواکونو ګواښونه ورځ تر بلې په توندیدو دي خو لا هم د افغانستان لوی اکثریت سیمې او ولسونه د طالبانو تر واک لاندې دي او لا هم امریکایان نه دي توانیدلي روانه جګړه په خپل نوم کړي
