د ټرمپ له امر سره سم پر سوريې هوايي بريدونه پيل شول
(کابل ټکی کام، ۱۳۹۷، وری ۲۵) د امريکا ولسمشر ټرمپ په يوې تازه ويډيو کې ويلي چې د سوريې د کيمياوي وسلو پر تاسيساتو يې د بريدونو امر ورکړ.
ټرمپ وويل، دغه بریدونه پر عامو خلکو د بشارالاسد د کيماوي بريدونو ځواب دی، غواړي چې د کيمياوي وسلو توليد ځايونه له منځه يوسي زیاتوي دغه بريدونه يې د فرانسې او برتانيې په همغږۍ او د هغوی په مرسته پيل کړي دي.
هغه وايي: “د فرانسې او برتانيې د وسله والو ځواکونو ګډ عمليات پيل شول او زه له دواړو هېوادونو مننه کوم.”
ټرمپ تېره شپه يوې خبري غونډې ته وويل، دغه حمله د سوريې پر دوما د کيمياوي وسلو د بريدونو په غبرګون کې کوي چې له څلوېښتو زيات ملکيان پکې وژل شوي و او لسګونه نور د کيمياوي وسلو د اسعتمال له کبله اغېزمن شول.
پر دوما له بريد وروسته ټرمپ وويل، چې دغه بريد د روسيې په همکارۍ د ځناور بشارالاسد په امر ترسره شوی دی او پر سوريې يې د بريد ګواښ وکړ.
که څه هم روسيې پر سوريې د میزايلو د شنډولو خبرداری ورکړی و خو د دمشق نه راپورونه وايي چې د ځينو چاودونو غږونه اورېدل شوي دي.
رويټرز ته ځايي سرچينو ويلي، چې نن سهار په دمشق کې د شپږو چاودنو غږونه اورېدل شوي دي.
سرچينې ته عيني شاهدانو ويلي، په دمشق کې برزا ولسوالۍ په نښه شوې کوم ځای کې چې د شام مهم ساینسي او څېړني مرکز شتون لري.
د اسکای نیوز د امریکايي مسئولينو له قوله ليکلي: چې سل يا له دې هم زيات توغندي په پوځي مرکزونو لګېدلي دي.
تر اوسه په دې بريدونو کې د تلفاتو خبرونه نه دي ورکړل شوي.
په ورته مهال، په ملګرو ملتونو کې د امريکا سفير ويلي چې د اټکل له مخې د بشارالاسد رژيم د تېرو اوو کلونو په موده کې په سوريه کې پنځوس ځلې له کيمياوي وسلې استفاده کړې ده.
