(کابل ټکی کام، ۱۳۹۷، وری ۲۹) د ولسي جرګې د نړيوالو اړيکو کمېسيون چارواکي وايي، په بهرنيو چارو وزارت کې داسې کسان ګمارل شوي لوړ تحصيلات څه چې آن د دولسم اسناد هم نه لري.
د دوي په وينا، په دې وزارت کې ډیری کسان هيڅ ډول تحصيلي سندونه نه لري او يواځې د اړيکو او سفارشونو له مخې د ديپلوماتانو په توګه په دندو ګمارل شوي دي.
د ولسي جرګې د نړيوالو اړيکو کمېسيون ادعا کوي، چې دغه کسان د بهرنيو چارو وزارت د اداري مرستيال او د بشري منابعو د رئيسانو له لوري پر دندو ګمارل شوي چې دا د ملکي خدمتونو د قانون خلاف عمل دی.
د ولسي جرګې غړی قادر ځاځی وطندوست وایي: “د ګومارنې ډېرې دوسیې يې ليدلي، یو شمېر دیپلوماتان د ملکي خدماتو قانون خلاف پر دندو ګومارل شوي. لیسانس څه ، چې په اړه یې ان د دولسم سندونه هم نه لري”.
د جرګې د نړیوالو اړيکو د کمېسيون غړی سید علي کاظمي وايي: “په هېواد کې د دیپلوماسۍ د یو غوره سیستم نشتوالي ستونزې رامنځته کړي او د افغانستان بهرنیو چارو وزارت هم تر بې برخې پاتې نه دی.”
تر دې مخکې هم له بهرنيو چارو وزارت څخه داسې راپورونه وکول شوي ګنې دغه وزارت ډیری خلک د شخصي اړيکو او قومپالنې له مخې په دندو ګمارلي دي.
څه موده مخکې د اداري فساد پر وړاندې د مبارزې ادارې د بهرنيو چارو وزارت د فساد مرکز بللی و او ويلي يې و چې په دغې وزارت کې اداري تعامل او ټاکنې د اړيکو او قومپالنې له مخې کېږي.
