(کابل ټکی کام، ۱۳۹۷، وری ۲۹) د کندهار ولايت په ميوند ولسوالۍ کې يوه سيمه ييز پوليس په يوې پوستې کې خپل څلور پوليس ملګري وژلي او خپله طالبانو ته ورغلی دی.
پېښه د ميوند ولسوالۍ په سپوزو سيمه کې رامنځته شوې ده.
ځايي سرچينې بريد تاييدوي وايي، د پېښې عامل پوليس د طالبانو سره په اړيکه کې و چې پوليسو ته يې مرګ ژوبله اړولې او نوموړی پوليس له بريد وروسته د طالبانو سره يوځای شوی دی.
طالبانو د دغې بريد پخلی کړی او وياند يې قاري يوسف احمدي ويلي، بريدګر د پوليسو په ليکو کې د دوی نفوذي کس و چې څلور سيمه ييز پوليس (اربکيان) يې وژلي او خپله د يوه ميل وسلې سره تر دوی ورسېدلی دی.
احمدي زياتوي، له يادې پېښې وروسته په سيمه کې له نورو اربکيانو سره هم نښتې شوي خو د مرګ ژوبلې په اړه يې معلومات نه دي ورکړي.
د ميوند ولسوالۍ يوې امنیتي سرچينې د نوم نه ښودلو په شرط پېښه تاييد کړې ده.
