(کابل ټکی کام ۱۳۹۷ وری ۳۰)
د ګلرحمان په نامه هغه افغان بندي چې شاوخوا ۱۵ کاله وړاندې د امریکایي استخباراتو له کبله ونیول شو او د سختو شکنجو له امله ووژل شو، یوځل بیا یې کورنۍ پر امریکایي استخباراتو عاریضه کړې.
د ګارډین ورځپاڼې د راپور تر مخه؛ د Foia په نامه مدافع ټولنې د امریکا له بهرنیو چارو له وزارت څخه غوښتي چې د جینوا د نړیوال قانون ترمخه دې د ګلر حمان جسد ور وسپاري او یا یې لږ تر لږه د قبر په تړاو معلومات ورکړي.
ګلرحمان د ۲۰۰۲ کال په اکتوبر میاشت کې د پیښور د کډوالو له یوه پنډغالي ونیول شو، چې تر نیولو وروسته د کابل په څنډه کې دhe Salt Pit په نامه د امریکا د استخباراتي ادارې یو پټ زندان ته ولیږدول شو.
ګارډین لیکي؛ نوموړی په دې زندان کې درۍ اونۍ تر تحقیقاتو لاندې ونیول شو او په دې لړ په یخو اوبو کې ورځې ورځې اوسیدل، وهل ټکول او تر بربنډولو وروسته په سپیو داړل او ګڼې نورې شکنجې په کې شاملې وې.
نوموړی د سختو شکنجو له امله د همدې کال په نومبر میاشت کې په داسې خونه کې مړ وموندل شو چې د هوا یخوالی یې صفر درجې ته رسول شوب وه او د نوموړي جسد هم د یخ له کبله کنګل سوی و.
له ګل رحمان سره په دې زندان کې د نوموړي وراره عبیدالله هم موجود و ،چې هغه ترې روغ ووت او په ۲۰۱۵ کال کې یې د ګلرحمان پر دو شکنجه کونکو امریکایي مامورینو «جیمز میچل» او «جان بروس جسن » دعوه وکړه چې ګواکې ګلرحمان د نوموړو د بې غورۍ له امله وژل شوی دی.
وروسته د سي آی اې مامورینو وموندله چې نوموړی رښتیا هم د سختو سړو له کبله وژل شوی او ویې ویل چې د نوموړي جسد لا هم په یخچال کې ساتل شوی..خو سي آی اې بیرته له دې خبرې وګرځیده او اوس عبیدالله خپله غوښتنه د بهرنیو چارو وزارت ته په دې توګه سپارلې چې “ قبر یې چیرته ده، د هغه بې روحه جسد غواړو، ولې سي ای اې هغه شکنجه او مړ کړ؟ او لږ تر لږه ددهغه د وژلو نښې نښانې را وښایاست “
د غوښتونکي ټیم مشر ویلي؛ د ګلرحمان مور، میرمن او درۍ لوڼې لاهم د راتګ لارې څاري باید امریکایي استخبارات مثبت ځواب ورکړي.
د میچل په نامه د ګلرحمان یو شکنجه کونکی اوس د سي آی اې لوړ پوړی مامور ده او د شکنجې ټول هغه فلمونه یې له منځه وړي چې نوموړي پکې په زندانیانو تیری کړی.
ښایي له سي آی اې څخه د پمپیو تر تګ وروسته د دواړو دوسیه یوځل بیا رابرسیره شي.
غوښتونکي ټیم ویلي ؛ که سي ای اې د ګل رحمان جسد ور وسپاره دا به د زرګونو هغو زندانیانو په پیداکولو کې رغنده رول ولري چې د امریکایانو له خوا په مختلفو تورونو وژل شوي خو لا یې هم د ژوند او مرګ پته نشته.
