فراه: د پوليس له لوري د موټر چلوونکي د وژل کېدو په غبرګون اعتراض
(کابل ټکی کام، ۱۳۹۷، وری ۳۰) نن سهار د فراه ولايت د مرکز مربوط د سور او شوراب سيمه کې د شاهرا پوليسو يو موټر چلوونکی په ډزوو وواژه.
ځايي سرچينې وايي، د لويې لارې پر سر د شاهراه پوليس له ټولو موټرچلوونکو نه باچ اخلي خو کله چې ياد موټرچلوونکي د پيسو له ورکړې ډډه کړې نو پوليس پرې ډزې کړی او ځای پر ځای يې وژلی دی.
د موټر چلوونکي د وژل کېدو په غبرګون کې لسګونه قهرجنو کسانو د اعتراض په ډول د هغه جسد د ولايت مقام ودانۍ مخې ته يووړ او عاملينو ته يې د سزا غوښتنه وکړه.
اعتراض کوونکو ګواښ وکړ که د دې پېښې اصلي عاملين پېدا او د قانون منګولو ته ونه سپارل شي نو پايلې به يې ښې نه وي.
دغې اعتراض کوونکو سره، د فراه والي عبدالبصير سالنګي په ياده پېښه کې د ککړو کسانو د نيول کېدو او د هغوی د محاکمه کولو ژمنه وکړه.
تر دې مخکې هم پوليسو د هېواد په بيلابيلو سيمو کې په ناقانونه توګه د لويو لارو پر سر له موټرچلوونکو پيسې اخيستي خو د نه ورکړې پر وخت د پوليسو له سخت عکس العمل، بې عزتۍ او وهلو ټکولو سره مخ شوي دي.
د فراه موټر چلوونکي وايي، دا په تېرو دوو کلونو کې پنځم موټر چلوونکی دی چې په دغه ډول قضيه کې خپل ژوند له لاسه ورکوي.
