ولسمشر اشرف غني د ولسي جرګې او ولسوالیو شوراګانو د راتلونکو ټاکنو لپاره د نوم لیکنې د کمرنګه بهیر د چټکولو په موخه د ولایتونو والیانو او نورو چارواکو ته په ټینګار ویلي چې خلک د ټاکنو لپاره نوم لیکلو ته وهڅوئ.
د ارګ له لوري په خپره شوې خبرپاڼه کې ویل شوي، ولسمشر اشرف غني نن ماسپښین په یوه ویډیويي کنفرانس کې د ولایتونو والیانو، نظامي چارواکو او د ټاکنو د کمېسیون ولایتي رییسانو ته ”لازمې لارښوونې“ وکړې.
په خبرپاڼه کې ویل شوي چې اشرف غني د حج او اوقافو وزیر ته لارښوونه کړې چې عالمان دې د جمعې د لمانځه پر مهال په خطبو کې د ټاکنو ارزښت بیان کړي او باید خلک نوم لیکنې ته وهڅوي.
”محمد اشرف غني همدارنګه والیانو ته لارښوونه وکړه چې ټول دولتي مامورین او د دوی کورنۍ دې په راتلونکې اونۍ کې د رای ورکولو لپاره خپل نومونه ثبت کړي او همدارنګه دې په ولسوالیو کې په دغه بهیر کې د ګډون په موخه د خلکو پوهاوی زیات کړي.“
۵ ورځې وړاندې (۲۵ حمل) د پارلماني او ولسوالیو شوراګانو د ټاکنو لپاره د نوم لیکنې بهیر پیل شو. ولسمشر، اجراییه رییس او نورو لوړپوړو دولتي چارواکو نوم لیکنه وکړه او له خلکو یې هم وغوښتل چې په دې بهیر کې پراخه ونډه واخلي. خو د نوم لیکنې په بهیر کې د خلکو کمرنګه او کمزوري ګډون حکومت اندېښمن کړی دی.
دوه ورځې وړاندې، اجرائیه رییس ډاکټر عبدالله عبدالله هم د ټاکنو د نوم لیکنې په بهیر کې د خلکو پر نه ګډون اندېښنه ښودلې وه او وړاندیز یې وکړ چې په ټاکنو کې ګډون ته د خلکو د تشویقولو لپاره باید پروګرامونه پیل شي.
د کارپوهانو په خبره، پر ټاکنیزو کمیسیونونو بې اعتمادي، د خلکو نه پوهاوي، پر ټاکنو د حکومت او په تېره بیا د بهرنیانو سیوری او روانې ناامني خلک ټاکنیزو ټیمونو ته له ورتګه راګرځولي دي.
بل خوا، د انتخاباتو د خپلواک کمېسیون چارواکي وایي چې نوم لیکلو ته د خلکو د تشویق لپاره یې له یو شمېر رسنیو سره د همکارۍ موافقې کړې دي تر څو خلک په ټاکنو کې ګډون ته تشویق شي او پراخه ونډه پکې واخلي.
د انتخاباتو د کمېسیون چارواکي وايي چې د نوم لیکنې پروسه به په دوو مرحلو کې – لومړی په ښارونو او وروسته په ولسوالیو او کلیو کې – ترسره شي او دوې میاشتې به ونیسي.
په پام کې ده د ولسي جرګې او ولسوالیو شوراګانو انتخابات د روان کال د تلې یا میزان په ۲۸مه ترسره شي.
