(کابل ټکی کام، ۱۳۹۷، غوایی ۱) د سمنګان ولايت د دره صوف پايان ولسوالۍ اوسېدونکي وايي، چې سيمه ييز پوليس ترې په غير قانوني توګه پيسې ټولوي او که چا سره نه وي بنديانوي يې او وژني يې.
د يادې ولسوالۍ يو تن اوسېدونکی چې له سيمې يې د پوليسو له زور زياتي کډه کړې ډاکټر امیرګل رسنيو ته ويلي، د کله پولۍ په نوم ترې سيمه ييز پوليس پيسې ټولوي، یانې که په کورنۍ کې درې کسان وي بايد د مياشتې سل دوه سوه یا درې سوه افغانۍ پوليسو ته ورکړي.
د اميرګل په خبره، که څوک دغه پيسې ورنکړي نو د پوليسو له لوري بندي کېږي، وهل کېږي او آن وژل کېږي هم.
دی وايي، له يادې ولسوالۍ پنځه سوه کورنۍ د سیمه ييزو پوليسو د زور زياتي له کبله نورو سيمو ته کډه شوي دي.
د سمنګان ولایت رسمي ادارې وايي، دا مهال ۵۲۷ کورنيو د پوليسو له زور زياتي خپل کورونه پرېښي او مرکز ته کډه شوي دي.
د يادې سيمې يو بل اوسېدونکي محمد نسيم ويلي، پوليسو ورباندې د کور پر سر وسله او پيسې غوښتې خو دوی يې د ورکړې وس نه لاره ځکه يې په دې سره ژمي خپلې سيمې پريښې او د غره په څنډه کې پراته دي.
د سمنګان والي عبداللطيف ابراهيمي او يادې ولسوالۍ امنيې قومندان حاجي عبدالله هم دغه ستونزه تاييدوي خو وايي هڅه کوي دغه مسله د خبرو له لارې حل کړي.
له بله پلوه د کورنيو چارو وزارت مرستيال ویاند نصرت رحيمي د يادې موضوع په اړه بې خبرې ښودلې په خبره يې په دې اړه به پلټنې وکړي څو ياده ستونزه حل او په قضيه کې ښکېلو پولیسو سره به قانوني چلند وشي.
دا لومړی ځل نه دی چې د سیمه ييزو پوليسو له بد چلند، زور زياتي څخه ملکي خلک شکايت کوي بلکې تر دې مخکې هم د هېواد په بيلابيلو ولايتونو کې ولسي وګړي وايي چې د سيمه ييزو پوليسو له ناوړه چلند، ظلمونو او غلاوو څخه تر پوځې راغلي دي.
