تميم توقيق
د کابل دوه سره ادارې نه يوازې په دين، وطن او هيوادوالو ملنډې ووهلې او د بدمرغيو په سيند يې لاهو کړل، بلکې له لويديځه راوارده کړې ديموکراسي يې هم په شرمونو وشرموله.
د امريکا په زر او زور تکيه کونکو بدمرغو چې د ارګ په ګدۍ پلتۍ وهلې، له هماغې ورځې تر ننه يې ټول اعمال د پاسنۍ خبرې نغد مثالونه دي، چې په دې واقعيت نن زمونږ د وړوکی او لوی سر خلاص دی.
نننۍ د ټاکنو لپاره د نومليکنې تت بهير خو دې خبرې ته د عام ولس ځواب هم ښه واضح کړ او ويې ښوده چې نور ولس د امريکا د لاسپوڅو د خټو په هغه پوزه نشي تيروتلی چې د خپلو اجيرو رسنيو لخوا ورته جوړه شوې وه.
د ع او غ ادارې رئيسانو چې په دې تنکي پسرلي د نومليکنې بهير رسماً پرانيست، لوی هدف يې يو ځل بيا د ولس تيرايستل و، هغه دا چې دوی د رسنيو له لارې ولس ته په ذهن کې اچول چې د جګړو تود موسم ته د انتخاباتي بهير ځنډول د ولس د سر په زيان تماميږي، مګر ولس په دې ډرامه کې په نه ګډون سره زباد کړه چې د مؤمن ولس په حيث به له يو غار څخه په دوهم ځل ونه چيچل شي.
ګني حقيقت دا دی چې کابل ادارې د پارلمان او ولسواليو د شوراګانو انتخابات د ژمي يخ موسم ته ساتلي و، خو خپل منځي اختلافات يې نن ورځې ته د رارسيدو عمده سبب شو. دوی اوس هم دغه بهير د کوم هيوادني، ملي او ولسي خدمت په خاطر نه دی پيل کړی، بلکې ستره موخه يې دا وه چې د ولس تيرايستنې پخه ګوله يې له خولې ونه وځي، مګر ولسي تحريم او چوپ خو ستوغ ځواب يې دا مړۍ هم په ستوني کې ښخه کړه.
کابل اداره او د دوی په تمويل ژوندۍ رسنۍ په انتخاباتي نومليکنه کې د خلکو تت ګډون د طالبانو د تهديد او نا امنۍ له امله ګڼي، خو داسې هيڅکله نه ده.
ځکه، که رښتيا ووايو تيرو انتخاباتو کې چې خلک د ديموکراسۍ شعارونو يو څه تيرايستلي و او له غرب څه راوراد شوي سړي يې هم سم نه و پيژندلي، په پراخ اکثريت يې نومليکنه وکړه او بيا د رايې مرکزونو ته حاضر شول. هغه مهال هم همدا طالبان و، همدغه امنيتي ستونزې وې او د سر خطر و، خو د خلکو ګډون له دې هر څه سره سره د نن په نسبت څو چنده زيات وو.
واقعيت دا دی چې نن خلکو دغه لاسپوڅي وپېژندل، نن يې د دوی حلقه بګوشي او بې خرته بې ګټې غلامي درک کړه او په دې باوري شوي چې که دا ځل مو هم همدا د پرديو ګوډاګيان راباندې واکمن کړل؛ نو په لوی لاس به مو د نورو بدمرغيو کندې ته ځان غورځولی وي. لکه په ۲۰۱۴ کې يې چې هيواد په يرغلګرو بايباد خرڅ کړ، دا ځل به له يوې مخې د ولس وژنې او بربادۍ تړون ورسره لاسليک کړي، چې دا هيڅ لرې نه ده.
د نن انتخاباتي بهير پڅوالي څرګنده کړه چې نور د لويدځوالو مهار کړي خلک د دې ولس په منځ کې ځای نه لري، دوی بايد له نجسو يرغلګرو سره يوځای له دې پاکې خاورې ورک شي او ولس پخپله خپل برخليک ټاکلو ته پريږدي.
همدا جمله د ننني چوپ ځواب ليکلی شکل دی.
