یمن: د سعودي ایتلاف په بمباریو کې لسګونو تنو ته مرګ ژوبله اوښتې

(کابل ټکی کام ۱۳۹۷ غویی۳)

د سعودي ائتلاف له خوا د یمن په جګړو کې یوځل بیا هوایي بریدونو زور اخیستی چې د مخالف لوري جګړې هم ورسره توندې شوې دي.
تیره ورځ د سعودي په مشرۍ د عرب هیوادونو د ایتلاف الوتکو د یمن د الحجه ښارګوټي اړوند د بني قیس په سیمه کې د یو واده پر مراسمو بمبارۍ کړې چې لسګونو کسانو ته په کې مرګ ژوبله اوښتې.
تر برید وروسته د یمن د الجمهوري روغتون له خلکو څخه د وینې غوښتنې کمپاین پیل کړی ترڅو ټپي کسانو ته وینه پیدا کړي.

امنیتي چارواکي وایي؛ په بمبارۍ کې د ۷ وژل او د ۱۵ نورو دټپي میدو پخلی کوي خو ځینې نورې سرچینې بیا وایي چې په برید کې ټولټال ۴۰ تنه مړه او ژوبل دي چې په کې د یوې کورنۍ ۵ غړي هم وژل شوي دي.

برید داسې مهال شوی چې تیره ورځ د یمن حوثي یاغیانو پر سعودي د بالیستیک توغندي برید وکړ چې د هغه هیواد د دفاعي سیستم په توسط خنثا کړل شو
د سعودي په مشرۍ د عربو ائتلاف په ۲۰۱۵ کال کې پر یمن بریدونه پیل کړل او لاهم دا بریدونه دوام لري.