(کابل ټکی کام، ۱۳۹۷، غوایی ۳) د ننګرهار ولايتي چارواکي وايي، تېره شپه داعش وسله والو په چپرهار ولسوالۍ کې د طب پوهنځي درې فارغ محصلين وژلي دي.
د والي وياند عطاءالله خوګياڼي رسنيو ته ويلي، داعش وسله والو د يادې ولسوالۍ مربوط د تريلي په سيمه کې په يوه کور اوښتي او د (نثار، نعيم او عبدالوهاب) په نومونو د طب پوهنځي درې فارغ محلصين چې درېواړه ورونه و، لومړی يې له ځان سره وړي او وروسته يې ترې سرونه پرې کړي دي.
د خوګياڼي په خبره، دغه درېواړه نوي له طب پوهنځي څخه فارغ شوي و او له دولت سره يې هيڅ اړيکې نه لرلې.
ځايي اوسېدونکي هم تاييدوي چې وژل شوي درېواړه ورونه تازه له طب پوهنځي فارغ شوي و او هيڅ دولتي دنده يې نه لرله.
تر اوسه د يادو کسانو د وژل کېدو اصلي لامل نه دی په ډاګه شوی، خو د والي وياند وايي چې د پېښې ځای ته د پوليسو پلټوونکې ډله رسېدلې او څېړنې پيل شوي دي.
دا په داسې حال کې ده، چې څه موده مخکې دولت په چپرهار ولسوالۍ کې د داعش پرضد عمليات ترسره کړل خو ځايي اوسېدونکي وايي چې لا هم په دغې ولسوالۍ کې داعش وسله وال فعاليت کوي او د دولت عملياتو کومه نتيجه نه ده ورکړې.
