څه وو، چې د امنيت مشر ” نبيل ” يې استعفاء ته اړ کړ؟
له يوې خوا په افغانستان کې ورځ په ورځ د امنيت خرابوالی او د بلې خوا د ملي امنيت د رئيس استعفاء افغان ولس انديښمن کړی دی، چې په دوه سرپرسته لرونکې اداره به څرنګه دهېواد امنيت وساتل شي؟ تراوسه پورې د دفاع وزارت د يو کال په پوره کېدا وزير نه لري او اوس ورسره د ملي امنيت چارې هم سرپرست ته وسپارل شوي. د ملي امنيت د رئيس رحمت الله نبيل استعفاء جمهور رئيس اشرف غني ته په داسې حال کې وړاندې کړل شوه، چې په روان کړنګ او واورين ژمي کې د ګرمۍ د موسم څخه څو چنده دهېواد ټولو ولاياتو کې روانه ده او دا امکان هم شته چې د تېرو کلونو په پرتله د دولت پرخلاف د جګړې يو لوری به دوو مخالفو لورو بدل شي . وروسته له دې به د دولت ځواکونه د دوو مخالفو وسلوالو ډلو سره په جګړه اخته وي. د خبرې رسنيو ترمخه د رحمت الله نبيل استعفاء ولسمشر اشرف غني د يوې بېړنۍ غونډې تر رابللو او سلا مشورو وروسته منلې چې په همدې ملي رياست کې يو تن مسعود اندرابي يې د سرپرست په توګه ټاکلی دی.
داچې رحمت الله نبيل استعفاء وکړه لا ملونه يې څه وو؟ وروسته به په پوره توګه څرګنده شي. خو د نبيل نږدي ملګرو د معلوماتو له مخې د نبيل په امنيتي کارونو او پلانونو کې د محدوديت وجود و، چې نبيل په کامله توګه د خپل هېواد او امن د ساتلو لپاره پوره واک نه درلود.
دويم لامل يې د دولت د ځينې چارواکو سره او هم خپله اشرف غني سره بې باوري وه .
دريم د اشرف غني سره به يې زيات وخت اختلاف په دې و، چې اشرف غني د امنيت په اړه قاطع دريځ نه لاره او نبيل به ويل چې بې له قاطع دريځه امنيت هېڅ وخت نشي راتلای .
څلورم لامل يې دا ښودل شوی چې د نبيل په وينا اشرف غني تردې وار په شفاهي ډول غوښتې چې استعفاء وکړي ؛ ځکه خو د ملي امنيت رياست د رحمت الله نبيل استعفاء ليک ولسمشر ته وړاندې کړ، يوه کاپي يې رسنيوته هم واستوله او پکې يې ځينې لاملونه چې دلته ياد کړل شول اشاره ورته شوې وه .
رحمت الله نبيل د پخواني ولسمشر حامد کرزي په دوره کې هم د امنت رئيس و چې په ۲۰۱۲ز کال کې يې د ناڅرګندو وجوهاتو له امله له کاره ګوښه او اسدالله خالد يې پرځای وټاکل شو . د نبيل او خالد ترڅنګ امرالله صالح او حنيف اتمر هم د ملي امنيت په دندو په تېرو ۱۴کالوکې ګمارل شوي ؛ خو د امرالله صالح او رحمت الله نبيل دريځ د ملي امنيت په اړه يوالی درلود ، چې د نبيل په وينا اشرف غني دهېواد امن او نورو ځينې مسايلو کې پرېکنده دريځ نلري ځکه دهېواد امن ورځ په ورځ خرابېږي. يو شمېر رسنۍ د پارلمان غړو او په ځانګړي توګه د ظاهر قدير پرلپسې نيوکې چې ملي امنيت په ننګرهار او ځينې نورو ولاياتو کې د داعش مخه نه نيسي او نه يوازې دا چې ملي امنيت يې مخه نه نيسي. ځينې لوړپوړي چارواکي د داعش سره نږدې اړيکې ساتي اوملي امنيت يې پکې ګرم باله . د ملي امنيت رئيس نبيل يې استعفاء ته اړ کړ خو کوم لامل چې تراوسه رسنيو نه دی روښانه کړی او نه د نظر خاوندانو څه ويلي هغه د ولسمشر سره دهغه په پاليسۍ او سياست اختلاف دی چې د ګاونډيانو او د سېمې دهېوادونو سره سالم او قاطع پاليسي او دريځ نه لري. کيدای شي نور لاملونه هم ورلري، چې وروسته به څرګند شي.
