(کابل ټکی کام ۱۳۹۷ غویی ۸)
طالبانو ویلي چې له تیرې شپې راهیسې یې د هیواد په مختلفو ولایتونو کې لسګونه امنیتي پوستې، قرارګاوې، پوځي مرکزونه او مهمات نیولي او ګڼو امنیتي ځواکونو ته یې مرګ ژوبله اړولې.
دفاع وزارت ویلي چې په ټول هیواد کې یې ټولټال ۴۲ وسلوال وژلي او لسګونه نور ټپیان دي خو طالبانو بیا مقابل لوري ته د اوښتو تلفاتو شمیر تر سلو پورته ښوودلی.
تخار
د دې ولایت د ولایتي شورا وایي طالبانو تیره شپه د تخار ولایت خواجه غار ولسوالۍ ګورتيپه سیمه کې دوه پوستې نیولې او دا ساحه یې په ټولیزه توګه تر ځپل پوښښ لاندې راوستلې.
طالبانو د یادې ساحې د نیولو پخلی کړی او ویلي یې دي چې پوستې ټولې تښتیدلې ۶ محلي پولیس وژل شوي او ۸ نور ټپیان دي.
بغلان:
ځایي چارواکي وایي چې طالبانو د ډنډشهاب الدین سیمې اړوند د خلازیو ستراتیژیکه ساحه له څو ورځنیو نښتو وروسته نیولې.
طالبانو هم منلې چې یاده سیمه کې یې د ټولو پوستو او قرارګاوو تر نیولو وروسته د خلازیو سیمه له دولتي حضور څخه پاکه کړې.
ننګرهار:
طالبانو په ګوشته ولسوالۍ کې د یوې پوستې او ګڼو مهماتو د نیولو او ۷ تنو عسکرو ته د مرګ ژوبلې اړولو خبر ورکړی دی.
طالبانو همداراز ویلي چې د دې ولایت د بټي کوټ ولسوالۍ د لعل چاپور سیمې او د غني خیلو ولسوالۍ شیرګړ سیمې څخه ورسره ۷ امنیتي ځواکونه یوځای شوي دي
غزني:
.
د دفاع وزارت ویلي چې د خوګیاڼو ولسوالۍ اړوند سیمو کې یې ۱۱ تنه طالبان وژلي او ۷ نور ټپیان دي چې په همهاله توګه بیا طالب ویاند ذبیح الله مجاهد دیوې خبرپاڼې په خپرولو سره دا خبر رد کړی او ویلي یې دي چې عملیاتي عسکرو خوګیاڼو ته د ورتګ هڅه کوله چې په قلعه قاضي سیمه کې له کمین سره مخ شول.
د ویاند په خبره، په دې برید کې ۱۵ عسکر وژل شوي او ۱۱ نور ټپیان دي.
طالبانو همداراز خبر ورکړی چې د دې ولایت د مرکز اړوند خشک سیمه کې او د قرباغ ولسوالۍ په ښاغلي سیمه کې د پولیسو ۳ پوستې د سختو بریدونو له امله شاتګ ته اړ شوې.
بدخشان:
طالبان وایي چې د دغه ولایت د تیشکان ولسوالۍ په مرکز او شاوخوا مراکزو او پوستو یې بریدونه کړي او ددشت لرنیګ سیمه کې یې یوه لویه قرارګاه او ۸ پوستې یې نیولې.
دوی همدارا لسګونه پولیسو ته د مرګ ژوبلې د اړولو ادعا هم کړې.
کابل:
طالبانو ادعا کړې چې د کابل سروبي ولسوالۍ ماهيپر سیمه کې یې د ګزک په نامه پوسته نیولې او ګڼ مهمات یې لاسته ورغلي.
کندوز:
طالبانو ویلي چې د قلعه زال ولسوالۍ امنیې قوماندانۍ په ګډون یې ۱۰ پوستې نیولې او ګڼ شمیر امنیتي ځواکونو ته یې مرګ ژوبله اړولې.
فراه:
طالبانو ویلي چې د دې ولایت د بالابلوک ولسوالۍ په سیازنګل کي یوه پوسته تللې او دوی پرې حاکم شوي دي.
طالبانو همداراز د بلخ په چهار بولک،دړهلمند په مختلفو سیمو، د نورستان په نوراګرام او ګڼو نورو ولایتونو کې د بریدونو خبر ورکړی دی.
د دې عملیاتو تر پیل وروسته امریکا او اروپایي ټولنې په وار وار طالبانو ته له افغان حکومت سره د خبرو بلنه ورکړې آن تر دې چې تیر ماښام د امریکا مرستیال ولسمشر مایک پنس په دې تړاو مخامخ له غني سره خبرې وکړې چې د لویدیځو مطبوعاتو د راپورونو ترمخه، دا عملیات تر هغه ډیر خونړي دي څومره چې یې فکر کیده.
