خوست: وسله وال بريد کې د بي بي سي خبريال وژل شوی
(کابل ټکی کام، ۱۳۹۷، غویی ۱۰) د خوست سيمه ييزې سرچينې وايي، چې شاوخوا يو ساعت مخکې د بي بي سي راډيو پر خبريال احمدشاه باندې وسله والو برید کړی او نوموړی وژل شوی دی.
سرچينې زياتوي، نوموړی پر خپل بايسکل کور ته روان و چې لاره کې پرې وسله والو برید کړی.
دا په داسې حال کې ده، چې نن په کابل کې د داعش وسله والې ډلې په سرتيرو بریدونو کې د اوو تنو خبريالانو وژل کېدو سربېره لسګونه کسان ووژل شول او نږدې پنځوس کسان ټپيان شول.
د کابل برید مسئوليت داعش ډلې په غاړه واخيست.
له بلې خوا طالبانو د کابل په شش درک برید کې لاس لرل ردي کړي او بي بي سي خبريال په وژل کېدو يې خواشيني څرګنده کړې ده.
د طالبانو وياند ذبيح الله مجاهد په خپله رسمي ټويټر پاڼه ليکلي: (د کابل د نن ورځې چاودنې او پيښې د اسلامي امارت د مجاهدینو پورې اړه نلري.)
مجاهد زياته کړې، نن مازدیګر د خوست په ښار کې هم د بي بي سي د خبریال احمد شاه وژل کیدل زموږ په مجاهدینو پورې اړه نلري.
طالبان وايي، احمد شاه يو ښه مسلکي خبريال و او دوی پرې خوا بدي دي.
