ننګرهار: ترافيکي پېښه کې پنځه کسان وژل شوي
(کابل ټکی کام، ۱۳۹۷، غویی ۱۷) د جلال اباد تورخم په لويه لاره د روداتو ولسوالۍ په مربوطاتو کې د يوې ترافیکي پېښې له کبله پنځو کسانو خپل ژوند له لاسه ورکړی او اووه تنه نور سخت ټپيان دي.
پېښه نن سهار د يادې ولسوالۍ په سرخ ديوال سيمه کې د ټوډي او سراچې موټر د ټکر له امله رامنځته شوې ده.
په وژل شويو کې يوه مېرمن او درې ماشومان دي، د پېښې ټول قربانيان د جلال اباد روغتون ته وړل شوي دي چې د ټپيانو روغتيايي وضعيت د ډاډ وړ ښودل شوی.
د پېښې لامل د موټر چلوونکو بې احتیاطي په ګوته شوې.
په هېواد کې وخت ناوخت د موټرچلوونکو د بې احتياطۍ او د سړکونو د خرابوالي له کبله مرګونې ترافیکي پېښې کېږي چې ډيری هېوادوال پکې خپل ژوند له لاسه ورکوي.
