(کابل ټکی کام ۱۳۹۷ غویی ۱۸)
د فاریاب ولایتي شورا وایي، وروسته تر هغه چې د پلچراغ ولسوالۍ د کولیان ستراتیژیکه سیمه چې ۱۲ کلي او ۲۱ پوستې په کې موجودې وې، سقوط وکړ، طالبانو خپل پرمختګ ته نور هم دوام ورکړ او د تغلیمس په نامه بله پراخه سیمه او ګڼې پوستې یې هم تر پوښښ لاندې راوستلې .
دولتي چارواکي مني چې د ګولیان او توغلیمس په نیولو سره د جمعیت ډلې د لوړپوړي قوماندان دادالله اړوند تر ۳۰ ډیر کسان طالبانو ژوندي نیولي او او لسګونه نورو ته مرګ ژوبله رسیدلې.
له سیمې څخه تازه راپورونه وایي چې نن ماښام ۸ بجې د یادې ولسوالۍ مرکز هم د وسلوالو طالبانو لاسته لویدلی او یاده ولسوالۍپه ټولیزه توګه د طالبانو تر واک لاندې راغلې .
د بلچراغ ولسوال عبدالجمیل صدیقي مازدیګر مهال رسنیو ته ویلي و، چې که وضعیت همداسې دوام وکړ او کومکي ځواکونه ور ونه رسیدل، ښایي ولسوالي سقوط وکړي.
ځایي چارواکي مني چې طالبانو د ولسوالۍ او اړوندو پوستو په سقوط سره په زیات شمیر مهمات او وسایط نیولې دي.
طالبانو رسماً د بلچراغ ولسوالۍ د سقوط په هکله تر اوسه څه نه دي ویلي
بل پلو دولتي ځواکونو ادعا کړې چې د دې ولایت د المار ولسوالي اړوند د جغاتک سیمه یې بیرته له طالبانو نیولې خو طالبانو دا خبر رد کړې او ویلي یې دي چې عملیاتي قوه یې له ماتې سره مخ کړې او کوم پرمختګ نه لري.
دا په داسې حال کې ده چې طالبانو نن ماسپیښن ۴:۰۰ بجې د بغلان د تاله وبرفک ولسوالۍ هم تر خپل کنترول لاندې راوستله.
د بغلان د ولایتي شورا رئیس محمد صفدر محسني وایي چې په تاله وبرفک کې د نظم عامې ګڼ ځواکونه طالبانو ته تسلیم شوي او طالبانو د ۱۲ ټانګونو او رینجرو په ګډون په زیات شمیر وسلې هم نیولې دي.
د دفاع او کورنیو چارو وزارتونو تر اوسه د دواړو ولسوالیو د برخلیک پع تړاو کوم وضاحت نه دی ورکړی
