(کابل ټکی کام، ۱۳۹۷، غویی ۲۲) د سوريې د بشري حقونو د څار ډله وايي، په سوريه کې د اسرائيلو د هوايي بريدونو پر مهال اووه ويشت کسان وژل شوي چې يوولس پکې ايرانيان دي.
د سوريې د جګړې څارونکې ډلې مشر رامي عبدالرحمن د فرانسې خبري آژانس ته ويلي، د اسرائلو له لوري د مئ په لسمه په سوريه کې ځينې پوځي هدفونه په نښه شوي، په ترڅ کې يې ۲۷ تنه وژل شوي چې شپږ سوريايي عسکر او يوويشت د بشارالاسد د رژيم پلويان دي چې يوولس پکې ايراني اتباع دي.
نوموړي، د نورو وژل شويو بهرنيانو هويت نه دی ښودلی په خبره يې په دې بريد کې څلور نور بهرني وګړي هم وژل شوي دي.
د پنج شنبې په ورځ د اسرائلو د دفاع وزارت په يوې اعلاميې کې وويل، د ایران د بريدونو په ځواب کې يې چې (د ګولان پر سيمه يې توغندي توغولي و) په سوريه کې د دغې هېواد پاسداران د قدس ډلې مرکزونه تر هوايي بريدونو لاندې نيولي دي.
تېره ورځ د ايران مذهبي مشر ایت الله علي خامنه ای اسرائيلو ته خبرداری ورکړ او ويې ويل، که په راتلونکي کې اسرائيل په سوريه کې ايراني ځواکونه په نښه کړي نو دوی به هم د اسرائيلو تل ابيب او حيفا ښارونه په توغنديو وولي.
په عين حال کې د اسرائلو دفاع وزير د سوريې له چارواکو غوښتي، چې ايراني ځواکونه او جنرالان له سوريې وباسي او هغوی ته ځواب ورکړي ځکه په وينا يې چې ايرانيان په سيمه کې ستونزې جوړوي.
