(کابل ټکی کام، ۱۳۹۷، غویی ۲۳) د افغانستان د ازادو او عادلانه ټاکنو بنسټ فيفا وايي، د تذکیرو پر کاپۍ د سټيکر لګول به په انتخاباتو کې درغلۍ نورې هم زياتې کړي.
د دغې بنسټ اجرائيوي رئيس يوسف رشيد وايي، پر تذکيرو د سټيکر لګول به دې ته لاره خلاصه کړي چې يو کس د خپلې تذکيرې په څو کاپيانو سټيکرونه ولګوي او رايه ورکړي.
د رشيد په خبره، د دې چارې په عملي کولو سره په انتخاباتو کې د درغلۍ او ناوړه ګټې اخيستو امکانات زيات دي او دغه عمل به خلک په ټاکنو بې باوره کړي.
په وروستيو کې ولسمشرۍ ماڼۍ د انتخاباتو د خپلواک کمېسيون له لوري په يوې اعلاميې کې ويلي، چې له دې وروسته خلک کولی شي د تذکيرې پر کاپي سټيکر ولګوي خو ځينو رسنيو وويل چې دا پريکړه د انتخاباتو کمېسيون له لوري نه بلکې د ولسمشر له لوري شوې ده.
تر اوسه په ټول هېواد کې يو نيم ميليون کسانو د انتخاباتو د رايه ورکولو لپاره نومليکنه کړې چې د ټاکنو کمېسيون په وينا دا ډېره کمه شمېره ده او خلک د امنيتي ستونزو او په ټاکنو د بې باورۍ له کبله په خپلو تذکيرو سټيکرونه نه لګوي.
په نومليکنه کې د خلکو د کم ګډون له کبله د انتخاباتو خپلواک کمېسيون درې ورځې وړاندې د ولايتونو په مرکزونو کې د نومليکنې پروسه يوه مياشت نوره هم وغځوله.
په عين حال کې د ولسي جرګې غړي هم د تذکيرو پر کاپۍ سټيکر لګولو سره مخالفت څرګندوي د جرګې غړی عبدالقادر وطندوست وايي: ” د تذکيرو پر کاپۍ سټيکر لګول به انتخابات له درغليو ډک کړي زياتوي دا به انتخابات نه بلکې، انتصابات وي، د دغه اقدام په اساس یو کس کولای شي چې په لسګونو مرکزونو کې نوم لیکنه وکړي او څو ځايه خپله رايه وکاروي.”
