(کابل ټکی کام، ۱۳۹۷، غویی ۲۳) د افغانستان د ۲۰۱۸م کال کورني کرکټ د احمدشاه ابدالي “فرسټ کلاس” سياليو پايلوبه د بندامير لوبډلې وګټله.
پايلوبه د بند امیر او امو لوبډلو تر منځ وه چې لوبه مساوي وشوه خو د لسو نمرو په ترلاسه کولو د بندامير په ګټه تمامه شوه.
په دې سياليو کې امو، بند امير، مس عينک، سپين غر، بست او کابل لوبډلو برخه لرله چې دوه مياشتې مخکې پيل شوې وې.
د دغې سيالیو مخکينۍ لوبې په ننګرهار، خوست او کونړ ولايتونو کې ترسره شوې وې خو پايله لوبه يې په کندهار کې وه.
د دغې سياليو په پای لوبه کې د کرکټ بورډ اجرائيه رئيس شفيق الله ستانکزي هم برخه واخيسته او د يادو سياليو تنظموونکي يې وستایل.
نوموړي وويل، د يادو سياليو هدف د کورني کرکټ وده او د نويو تکړه لوبغاړو مالومول دي.
د آمو لوبډلمشر ضياءالحق د پايلوبې په دواړو اېننګزونو کې ۱۴۴ منډې وکړې او درې لوبغاړي يې وسوځول چې د لوبې غوره لوبغاړی ونومول شول.
دغه راز، عبدالواسع د ۵۴ ويکټو په ترلاسه کولو او ۳۶۸ منډو په جوړولو د احمدشاه ابدالي سياليو غوره لوبغاړی وټاکل شو او حمزه هوتک د ۶۷ ویکټو په اخيستلو سره د سياليو غوره توپ اچوونکی او درويش رسولي د ۱۰۷۳ منډو په جوړولو غوره توپ وهونکي ونومول شول.
د افغانستان د کرکټ بورډ د احمدشاه ابدالي ساليو اتلې لوبډلې ته شپږ لکه افغانۍ او دويم مقام ګټونکي لوبډلې ته څلور لکه افغانۍ د انعام په توګه ورکړې.
