(کابل ټکی کام، ۱۳۹۷، غویی ۳۰) د غزني سيمه ييزې خبري سرچينې وايي، طالبانو د دغه ولايت د اجرستان ولسوالۍ ودانۍ، امنيه قومندانۍ او شاوخوا امنيتي پوستې نيولي دي.
له تېرو څو ورځو راهیسې په اجرستان ولسوالۍ د طالبانو له خوا بريدونه روان و او ياده ولسوالۍ يې کلابنده کړې وه.
تېره ورځ د اجرستان ولسوالۍ ولسوال حمدالله ګواښ کړی و که مرسته ور ونه رسول شي نو ځانونه به طالبانو ته تسليم کړي.
د طالبانو وياند ذبيح الله مجاهد د يادې ولسولۍ نيول تاييد کړي او کابل ټکی کام ته يې په رالېږلې خبرپاڼې کې ويلي چې تېره شپه يې د اجرستان ولسوالۍ ودانۍ او امنيه قومندانۍ نيولي، ولسوال، امنيه قومندان او ځينې نور مسئولین تښتېدلي دي.
طالبان وايي، په ياده ولسوالۍ کې دوولس تنه عسکر له خپلو وسلو سره تسليم شوي چې اوس مهال په امن کې دي.
خبرپاڼه کې راغلي، چې طالبان د ولسوالۍ په نږدې سیمو کې په تصفيوي عملياتو بوخت دي ترڅو له ولسوالۍ څخه د تښتېدليو مسئولینو څرک معلوم کړي.
تېره ورځ حکومتي چارواکو ادعا کړې وه چې په اجرستان ولسوالۍ کې عمليات کړي او طالبانو ته يې مرګ ژوبله اړولې ده خو د طالبانو وياند ذبيح الله مجاهد د حکومتي چارواکو ادعا رد کړې په خبره يې ” د دښمن هغه ادعاوې حقیقت نه لري چې وايي په اجرستان ولسوالۍ کې يې د بمبار له امله ګڼو مجاهدینو ته تلفات اړولي.”
ويل کېږي، د يادې ولسوالۍ د نيول کېدو پر مهال طالبانو په زياته انداز وسلې، مرمۍ او پوځي مهمات ترلاسه کړي دي.
امنيتي چارواکو شمشماد ته ويلي، ګڼ شمير پوستې سقوط شوي او اوس مهال د اجرستان ولسوالۍ په ودانۍ جګړه روانه ده خو سيمه ييزې امنيتي سرچينې وايي چې ولسوالۍ د طالبانو په لاس سقوط کړی او دا مهال طالبانو پرې خپل بيرغ پورته کړی دی.
یادې سرچينې ويلي، تر اوسه د اجرستان د ولسوال حميدالله هيڅ درک نه دی لګېدلی او هغه سره يې امنيه قومندان هم لادرکه دی.
د طالبانو د الخندق عملیاتو له پيل راهيسې چې نږدې مياشت يې پوره کېدونکې ده دا څلورمه ولسوالۍ ده چې طالبان يې له دولتي ځواکونو نيسي.
